Joe Biden rawtna Netanyahu-a’n pawm

Prime Minister Benjamin Netanyahu thuihhruai chuan US Presidnet Joe Biden-an Gaza indonaa inkahhai a awm theih nana ruahmanna a siam te chu tha tawk lo hle mahse Israel chuan a pawm dawn iin a sawi.
Britain newspaperay Times tena an kawmnaah Netanyahu chief foreign policy adviser Ophir Falk chuan Biden rawtna chu ‘tha tak ni lo mah Israeli mitang te chhuah zalen kan duh bawk si avangin kan pawm a ni’ tiin a sawi.
“Thil tam tak chinfel ngai a la awm” tia sawiin Israel in a phut tlat ‘mitang te chhuah zalen leh Hamas terrorist organisation chutchimih chu an thil tum a la ni bur’ tiin a sawi bawk.
Joe Biden chu Gaza indona-a Israel thlattu niin mahse civilian nunna chan an tam lutuk tawh avangin inkahhai a awm theih nan ruahmanna thar a siam leh ta a, thuang thumin a dung a.
A thuang khatnaah chuan Hamas tena Israeli mitang an kawl te chu an chhuah tur a ni a, chumi hnuah inbiakna neihzui niin inremna a awm theih nan hmalak zui a nia, a thawh hnihnaah mitang zawng zawng la chhuah bang te chu chhuah zalen an ni thung ang.
Biden chuan tum tam tak inkahhai a awm theih nan hmalakna a nei tawh a, tuna ruahmanna a siam ang tho hian a hma pawhin ruahmannan February thla khan Ramadan laiin Israel in inbeihna chawlhsan lailawk a remti a ti a, mahse, March 10 a Ramadan hman a nih hnuah pawh inkahhaina chu a awm thei ta chuang lo
Harsatna lian ber chu Israel chuan Hamas te chhutchimih buai tumin inkahhaina a awm pawhin hun reilote bak a remtih tlat loh vang a ni. Chutihlaiin Hamas te chuan indona tihtawp a ni hlen dawn tih an chian hma chuan lung in tang te chu chhuah zalen an tum lo bur ve thung.
Biden chuan a rawtna thar berah chuan Hamas ten thuneihna chang tawh lovin Gaza ah ni tha zawk hmuh a ni ang a ti a. Mahse, engtiangin nge ruahmanna kimchang a siam dan chu a sawi lang lo thung a, inbiakna thawhkhatna atanga thawh hnihna neihna turah thil tam tak chinfel ngai a awm a ti thung.
Falk chuan Netanyahu an ‘kan thiltum kan hlen hma chuan inremna tluantling a awm lovang’ a tih chu an dinna a la nih reng thu a sawi nawn bawk a.
Hetihlai hian Netanyahu chu acoalition sorkar derthawngah a awm mek thung a. A chhan ber pawh a thahwpui far-right partnet pahnih te chuan Hamas te nena inremna siam hrim hrim chu an duh loh bur vang a ni.
Joe Biden hmalakna chu Hamas te pawhin a thuphungin an pawm thu sawiin senior Hamas official Sami Abu Zuhri chuan ‘Netanyahu emaw Biden te namnul mai mai tur chuan Hamas hi a lian lutuk’ tiin a sawi thung.
A hma in Hamas official, Osama Hamdan chuan, “Biden thusawi atangin thil tha lam a awn a, mahse, inremna siam a nih chuan kan thil ngiatte a hlawhtling ngei tur a ni” tiin a sawi.
Hamas te chuan Gaza a inbeihna tihtawp nghal. Israel sipai awm te lakchhuah vek leh Palestinian te tana free movement leh reconstruction aid pek te an ngiat a ni.
Hamas te rawtna chu Israel chuan pawm ve lo thungin Hamas te rawtna tihpuitlin a nih chuan October 7 a Hamas tena Israel an beih ang dinhmun chiahah an let leh dawn tiin a sawi ve thung.
Gaza buaina hi Hamas fighter ten 7 October 2023 a Israel rma luta mi 1,200 chuang tihluma mi 450 chuang mitanga an hruai atanga intan a ni a. Israel in a beihletnaah Palestinian 36,000 chuangin nunna an chanphah tawh a, Gaza a chhe nasa hle tawh a ni.
Israel chuan Gaza a Hamas te chu atana hlauhawm ni tawh ngai lo tur law law a chhut chhiat a tum a. Chumi tur chuan Rafah khawpui chu Hamas la awm te awmkhawmnaah ngaiin bei chhunzawm lo tura ngenna pawh uksak duh lovin a beizui a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More