Joe Jonas-a’n a nupui Sophie Turner nena inthen dilna court-ah thehlut

Joe Jonas-a’n a nupui Sophie Turner nena inthen dilna court-ah thehlut
Jonas Brothers zing ami Joe Jonas chuan a nupui, Hollywood star Sophie Turner nen kum li an inneih hnuah inthen dilna court-ah a thehlut ta tlat mai. Joe Jonas hian inthen a dilna chhanah chuan, an nupa inkar chu siamthat leh theih rual lohin a kehchhe tawh niin a tarlang.
An nupa inkarah neuh neuh a awm tih thawm awm mah se an pahnih hi chuan an ngawi thei hle a, Thawhtanni kalta mai pawh khan Jonas hi hian an inneih zungbun pawh langsar takin a la bun a, Sophie pawhin a Instagram post hnuhnung ber, August ni 12 khan Joe Jonas lehg a unau ten world tour an neih tur lawmpuina te pawh a la post a ni. Joe Jonas telna, Jonas Brothers hian August ni 12 khan ‘Five Albums. One Night. The World Tour’ chu Yankee Stadium, The Bronx, New York-ah an kick-off a ni.
Mahse, Miami-Dade County, Florida-a court document chu a hawi lam a dang ta daih mai. Jonas-a dilnaah chuan an nupaa an fate pahnih chu a bula an awm rih thu leh, naupang te thatna turin an fate enkawl chungchangah thuneihna inang neih an duh thu a tarlang tel a, hetihrual hian an inneih hmain an inthen leh palh a nih pawha inremsiamna (prenuptial agreement) an nei lawk niawma rin theih turin a tarlang tel bawk.
Joe Jonas leh Sophie Turner te hi 2016 khan intawngin, 2017-ah an inhual a, May 2019 khan Las Vegas-ah an inkutsuih a, June 2019-ah Chateau de Tourreau, France-ah an chhungte leh thiantha te sawm khawmin an innei tha leh a ni. Jonas leh Turner te hian fa pahnih nei tawhin, a upa chu Willa a ni a, a naupang hi kumin July-a piang kha niin, a hming hi an la puangzar lo.
Jonas Brothers hian Billboard 200 (albums) chart top 10-a lang thei album paruk nei tawhin, chung zinga pathum chu No.1 an kai a, Billboard Hot 100 (Singles) chart top 10-a lang thei hla pathum nei tawhin, 2019-a an hla hit ‘Sucker’ chu No.1 a kai nghe nghe a ni. Joe Jonas hian ama puala band a din DNCE pawhin Billboard 200-a lang thei album pahnih an nei a, Hot 100 top 10-a lang thei hla pakhat ‘Cake by the Ocean’ an nei tawh bawk. Soloist ang pawhin No.15 album a nei tawh a, Demi Lovato nena an zai dunna Camp Rock soundtrack single ‘This Is Me’ chu Hot 100-ah No.9 a kai tawh bawk.
Sophie Turner hi HBO television series ‘Game of Thrones’-ah 2011-2019 khan Sansa Stark lema changin lemchan khawvelah hming a chher hle a, Emmy Award nomination-ah pawh Outstanding Supporting Actress in a Drama Series-ah 2019 khan a lang nghe nghe a ni.
Turner hi 2013 khan British drama television film The Thirteenth Tale-ah changin, hemi kumah tho hian psychological thriller ‘Another Me’-ah a chang a, hei hi feature film-a a channa hmasa ber a ni. Hei bakah hian action comedy ‘Barely Lethal’-ah 2015-ah changin, 2016-2019 khan X-Men film series-ah Jean Grey / Phoenix lemah a chang bawk.