Jordan Centre hlan turin sawrkar a inpeih Ruihhlo ngai enkawlna liantham din tum – Social Welfare minister

Jordan Centre hlan turin sawrkar a inpeih
Ruihhlo ngai enkawlna liantham din tum
– Social Welfare minister
Sethawn-a ruihhlo ngai enkawlna hmun – Jordan Centre chu Mizoram Synod hnena hlan turin sawrkar a inpeih tawh tih Social Welfare minister Lalrinpuii chuan a sawi a. Midang enkawl zui turin ruihhlo ngaite enkawl zui zelna tur liantham tak din tum a ni tih a sawi bawk.
Nilainia Assembly Session-a zawhna chhangin Social Welfare minister hian, Jordan Centre hlan tur hian sawrkar a inpeih fel a, a, inremna thu an thlung tawh a, Law & Judicial department-in an vet tawh a, Finance department vet turin a awm mek tih a sawi. Mizoram Synod pawh an inpeih thawkhat a, budget atan cheng vaibelchhe 2 an dah tawh a, Synod Executive Committee an nei leh hnai a, hemi hnu hian chiang zawkin an rawn hriattir theih tawh a rinawm tih a sawi bawk.
Sawrkarin Jordan Centre a enkawl chhunzawm zel loh chhan sawiin minister chuan, state sum dinhmunin a zir loh bakah sawrkar hnathawk anga hma lak a, sawrkar hnathawh anga thawh chuan kan thatchhe tlang a, tih tak tak na kan pe peih lo a, kohhranin enkawl se a tha ber ang, tiin sawmna an siam a, chhangtu an awm loh avangin Synod an dawr ta tih a sawi a ni.
Synod-in a lak hnu ah pawh sawrkar chuan kum tin grant -in- aid cheng nuai 50 a pe anga, hei hi a tul anga tih pun zel theihin an dah tih a sawi.
Social Welfare minister chuan, ruihhlo doah sawrkar a tang em em a, tunah hian Lungleng ramah speaker Frederick Lalrindika minsitry enkawl turin liantham deuh tak din tum a ni a, after care leh skill development lam thlenga kalpuiin, khawvel hriat tham khawpa kalpui tum a ni tih a sawi bawk.