Jordan Centre kalpui dan minister-in en

Jordan Centre kalpui dan minister-in en
Social Welfare minister Er. Lalrinawma chuan Jordan Centre Sethawn tlawhin thawktute leh enkawl mekte a kawm a. Department hotute nen Centre tih changtlunna’na hmalak dan tur an sawi ho.
Ruihtheih thil chu ram leh hnam hmelma hlauhawm tak a nih angin, ruihhlo laka fihlim tura inenkawlna hmun, Jordan Centre kan nei chu tangkai taka hman a tul tih Social Welfare minister hian a sawi a. Beiseina nena Jordan Centre pantute beiseina tihhlawhtlin a nih theihna’n thawktute chu inpekna thuk tak nen an hna kalpui turin a fui. Centre-a enkawl mekte chu an awm chhungin insiamthat tumna rilru nei chunga hun hmangtha a, chhungkua leh khawtlang tana mi tangkai ni turin a fuih bawk.
Minister hian Jordan Centre a tlawh zawh hian ‘After Care Home’ Thingdawl tlawhin, hmalakna kalpui dan tur a enpui a. Ministry of Tribal Affairs kaltlanga sak, Eklavya Model Residential School Bilkhawthlir sak mek chu a hmunah a endik nghal a ni.
Jordan Centre Sethawnah hian 2022 February 7 atang khan ruihhlo avanga harsatna tawkte enkawl tan niin, tun thlengin mi 402 enkawl an ni tawh a. Thla hnih chhung enkawlna kalpui niin thawktu – honorary workers 41 leh thawktu nghet 15 an awm a ni. Thawktute chuan Centre awmchilh tur doctor an mamawh thu te, mamawh zual lamkhawmna tur lirthei leh Centre-a enkawl laite taksa insawizawina tur khelmual an mamawh thu te an lo thlen a ni.
EMRS Bilkhawthlir hi Ministry of Tribal Affairs atanga cheng vaibelchhe 24 vel hmanga sak mek a ni a, building 11 sak mek niin, kumin chhunga sak zawh hman beisei a ni. Tribal tana duan bik niin, class 6-12 tan Arts, Science leh Commerce zirna awm tura duan a ni.
Mizorama khaw 6-ah Eklavya zirna in hi kalpui mek niin, Bilkhawthlir bakah Tlangnuam, Zawlnuam, Siaha leh Tlungvelah sak mek a ni a, khaw 6-ah sak belh turin ruahman mek a ni bawk.