Executive leh Judiciary inkarah inhnialna a awm mek laiin Union Law Minister Kiren Rijiju chuan judge te chuan inthlanah an chuh ve a ngai lo va, judge an nih hnuah pawh mipui ten chik taka endikna an tawng ve lo tiin a sawi.
-- Advertisement --
Mipui ten judge an thlak thei lo chungin Rijiju chuan judge-te chu mipuite chuan an thutlukna siam, dikna an dinchantir dan leh an chet vel dan chu an enthla reng a ti bawk.
Delhi Bar Association tena event an huaihawta thusawina a neihahah Kiren Rijiju chuan politician te chu mipui thlan an ni a, kum nga dan zelah mipui duh loh chu thlakin an awm mai a. Mahse, judge te chu an thutnaah an thu chatuan mai a ni a ti bawk a. Mipuite chuan politician te chu sawiselin inthlanah pawh an duh loh chu an hnawl maia mahse judge te chuan chutianga chik taka enthlakna emaw leh inthlan pawh an hmachhawn ve lo a ti bawk.
“Mahse, mipui ten an enthla reng che u a, in lakah a ngaihdan an siam ve tho. In judgement siam hmang khan justice in dinchantir dan a lang a. Mipui ten thlir rengin chuta tang chuan ngaihdan an siam mai thin,” tiin Rijiju chuan a sawi bawk.
Narendra Modi-an thuneihna a laka Prime Minister a nih atangin leh amah Rijiju chu Law Minister a nih hnua, ‘sorkar chuan judiciary tichhe tur emaw constitution kalhin emaw chetlakna engmah a nei ngai lo’ tia sawiin BJP sorkar chuan Constitution chu a thu leh a takin a zah a ti a.
“PM Modi an constitution hmanga thutiam a neih hnuah hna a thawk tan a. Constitution chu India lehkhabu thianghlim ber a ti a, Constitution-in kawng a kawhhmuh angin ram a kaihhruai tur thu a sawi a ni,” tiin law minister chuan a sawi a.
Kiren Rijiju chuan Chief Justice of India (CJI) chuan social media platform hrang hranga online hmanga judge te thlurbinga nasa taka sawiselna thleng chu enfiah tura a ngen thu a sawi a.
“CJI chuan judge chungchang dik lo taka sawi te lakah hma la turin min ti a. A rawtna ka ngai pawimawha kan ngaihtuah mek a ni. Mahse, lian tham taka mipui ten an sawisel tlat chuan eng nge tih theih kan neih ang?” tiin a sawi bawk.
Minister chuan thenkhatte lahin tuna thil thleng mek – sorkar leh judiciary inkar chu ram chhungah ‘mahabharat’ thleng mekah an lo chhuah bawka a ti a.
“A dik lo a ni. Kan inhmukhawm ho reng a. CJI leh kei pawh kan in be renga, thil lian leh te tham pawh kan sawiho zel,” tiin a sawi a.
“Ngaihdan inang lo a awm fo va. Political party mi ka nia lawm. CJI hnenah 6th January khan lehkha ka thawn a, ka tih tur ka ti a ni zawk a, eng nge inziak chu mipui hriata phochhuah a tulna a awm lo. Thil kalphung leh kaldan sa a ni,” tiin a sawi bawk.
Union Law minister Kiren Rijiju chuan judges, lawyers leh sorkar inkarah engmah buaina a awm lo, BJP sorkar chuan lawyer naupang zawk tena career hlawhtlng tak an neih theih nan environment tha a siam zel ang, tiin a sawi bawk.