Kuminah April thlaah Covid-19 hrileng a hluar leh a, May-ah phei chuan hri vei zat a pung nasa. Vanneihthlak takin June-ah a zual lo a, a hma thla aiin hri vei zat a tlem.
IDSP te’n an chhinchhiah danin, thla liam taah khan Mizoramah mi 116-in hri an vei a, May-a vei zat 375 zatve vel a ni.
June thlaah hian mi 767 endik an ni a, chuta tanga chhutin hri vei hi 15.12% an ni. Hemi thlaah hian hri vei enkawl mi 146 an dam a, vanneihthlak takin June thlaah hian hri vanga nunna chan an awm lo.
June thlaah hian hri vei zat a tlahniam na a, hri vei hriatchhuah thar erawh an awm deuh reng; ni 4, ni 11, ni 15, ni 17, ni 18, ni 21, ni 22, ni 23, ni 25, ni 29 leh ni 30-te tih loh ni dangah chuan hri vei hriatchhuah thar an awm ziah a, hriatchhuah thar an awm loh ni thenkhat pawh hi endik a awm loh ni a ni.
Covid-19 hrileng hi nikum kum tawp lamah a zia a, nikum December ni 12 hnuah hri vei hriatchhuah thar an awm hnuah mi dang an awm lo vang vang a, kumin February ni 28-ah pakhat hriatchhuah a ni. March ni 2-ah pahnih an awm leh a, mi dang an awm zui lo leh.
April ni 1-ah hriatchhuah thar pakhat a awm a, ni 13-ah pahnih an awm leh. Chumi hnu chuan a pung ta a, April ni 22-ah mi 15-in an vei tih hriatchhuah niin, hei hi nikum November ni 10 hnua hriatchhuah thar an tam ber ni a ni. May ni 1-ah phei chuan hriatchhuah thar zat hi 34 a ni.
June-ah a zia leh deuh a, mahse kumin kum tir lam nena khaikhin chuan June thla chhunga hriatchhuah zat hi a tlem lo.
June-ah a hma aiin hri vei tlem
Get real time updates directly on you device, subscribe now.
Prev Post
Next Post