June-ah ECL Champhai hawn tum

Kumin June-a hawn hman tum, Experiential Learning Centre (ELC) Champhai enkawl tura din, Management Committee of ELC chu an chairman, district bawrhsap James Lalrinchhana hoin an thukhawm.
Chairman hian ELC hi sawrkar laipui Ministry of Information & Broadcasting kaltlangin state thlan bikah din a ni, tiin, Champhai district chu Mizorama district zinga ELC hmalakna awmchhun a ni tih a sawi. Khawvel thiamna sang zelah artificial intelligence-in kan nunah hmun a chang nasa a, games bakah zirlai puitu tur dah a nih dawn avangin ELC chu zirna hmun pawimawh taka siam tum a ni tih a sawi bawk.
Chak zawka hna thawh theih dan tur sawiho niin, hnathawh hmabak la awmte chu a rang thei ang bera zawh fel tum nise, an ti a. A enkawl chhunzawm zel nan ELC hawn hnua entry fee leh khawl hman man tur rate sawiho a ni. Hemi chungchang hi zirchian hmasak nise, an ti bawk. Zirna kaihhnawiha pantute tan engemawchen ngaihhnathiamna siamsak nise tih a ni a. A hmuna thawk nghet tur receptionist pakhat leh a chhunga khawl enkawltu tur operator pahnih lak nise tih a ni. ELC hi kumin June-a hawn hman tum a ni.
ELC-a virtual reality gaming bik atan BellAtoZ atanga lokalten kumin May 18 khan gaming material-te endikin May 20 khan master trainer turte training an pe a ni.
ELC bungraw hrang hrang, EGG VR (a ruala mi pahnih chuan theihna), bike racing, car racing, 360VR, gaming arena, walk the plank leh HoloWorld-te chuan March 29 khan Champhai a thleng a; tunah hian hmunhma buatsaih leh khawl bunfel hna thawh a ni.