Jung Kook-a’n Oasis hla ‘Let There Be Love’ a cover

Tunkar chu BTS member Jung Kook-a’n chanchin a ngah riau mai, a hla thar ‘Seven’ a tichhuak a, a promotional tour nei zuiin, July ni 20 khan BBC Radio 1 Live Lounge-ah inlanin, Oasis hla ‘Let There Be Love’ a perform bawk. He hla hi 2005-a Oasis album ‘Don’t Believe the Truth’ tih ami kha a ni.
Keyboard, drums leh guitar nen Jung Kook zai hi an rem a, a vocal performance a ngaihnawm khawp mai. A zai tawp dawn lamah Jung Kook hian camera chu salute pehin lawmthu a sawi sap bawk.
BBC Radio 1-a a perform chhung hian Jung Kook hian BTS member dang ten anmahni pual project an buaipui chungchanga a ngaihdan te pawh a sawi a, “Kan solo project hmanga mimal anga hmasawn theihna hun kan nei hi a tha ka tia, kan duh zawng leh ngainat zawng te kan kalpui thei a. Hetia mimal anga hmasawnna kawng kan zawh hnuah hi chuan team ang pawhin kan tha lehzual ngei ang. Chu chu a hma thei ang bera thlen tir ka duh ngawt mai,” a ti a, a hla thar ‘Sever’ a perform nghal bawk.
Jung Kook hian ‘Seven’ hi July ni 14 khan a tlangzarh a, a tukah Good Morning America Summer Concert stage-ah a vawi khat nan live-in a perform zui nghal. He hla hi rapper Latto nena an thawh dunna a ni. He hmeichhe rapper chawrno mek hian kumin thawhpui a nei nual tawh a, TiaCorine ‘Freaky T’ remix leh Cardi B-i’n a puihna ‘Put It On Da Floor Again’ leh Lu Kala a thawhpuina ‘Lottery’ te pawhin ngaihven a hlawh viau a ni.
‘Seven’ hi Jung Kook tan 2022 FIFA World Cup soundtracj ‘Dreamers’ hnua a solo release hmasak ber a ni a, ‘Seven’ music video-ah hian Han So-hee chu Jung Kook-a ngaihzawng lemah a chang nghe nghe a ni. He music video hian kar khat pawh a tlin hmain YouTube-ah vawi maktaduai 83 en a hlawh der tawh bawk a ni.