Justin Bieber-a ‘Daisies’-in Alex Warren ‘Ordinary’ nawr sawn zo lo

Justin Bieber-a ‘Daisies’-in Alex Warren ‘Ordinary’ nawr sawn zo lo
Rimawi khawvela a thawm a reh deuh vang vang hnuah Justin Bieber chuan album thar ‘SWAG’ a tlangzarh a, Billboard 200 (albums) chart No.2-ah a debut a, he album-a a hla ‘Daisies’ pawh Billboard Hot 100 (singles) No.2-ah bawk a debut a, Bieber-a hla he chart top 10-a lang thei 27-na a ni a, he chart top 10 a lang thei hla ngahah Janet Jackson nihrualin, 10-na ve ve an ni.
Hetihrual hian Alex Warren hla ‘Ordinary’ chuan a satliah lo tih lantir zelin, JB-a pawhin a nawr tawlh zo rih lo a, Hot 100 chart-ah No.1 ni lehin, a zawnin kar sarih chhung a No.1 ta. Ravyn Lenae pawhin ‘Love Me Not’ chu top 10 a kaipui ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Alex Warren ‘Ordinary’ hian kar khat chhungin stream maktaduai 19.6 leh sales 6,000 bakah radio airplay ngaithlatu maktaduai 73 a la nei thei a, hei hi chart-ah a No.1 pui leh ta a ni.
Justin Bieber hla thar ‘Daisies’-in stream maktaduai 27.6 leh sales 4,000 bakah radio airplay ngaithlatu maktaduai 4.3 neiin, chart No.2-ah a debut a, April 2022 a a hla ‘Ghost’ No.5-a a lan hnua he chart top 10-a a lan lehna hmasa ber. Bieber hi he chart top 10-a a lanna hmasa ber chu February 2010 kha niin, a hla hit leh a lar chhuahna ‘Baby’ chu No.5 a kai. Tunah hian top 10-a lang thei hla 27 nei tawhin, chung zinga hla pariat chu No.1 an kai thei a ni.
Chart No.1 hlui Morgan Wallen ‘What I Want’ featuring Tate McRae chu No.3-ah bawk awm lehin, KPop Demon Hunters soundtrack HUNTRIX (EJAE, Audrey Nuna & REI AMI) ‘Golden’ chu No.6 atangin No.4-ah a insawn a, Morgan Wallen ‘Just in Case’ chu No.4 atangin No.5-ah a tawlh a, chart No.1-a kar 19 awm thei Shaboozey ‘A Bar Song (Tipsy)’ chu No.5 atangin No.6-ah a tawlh ta bawk.
Ravyn Lenae ‘Love Me Not’-in stream maktaduai 14.1, sales 1,000 leh radio airplay ngaithlatu maktaduai 36 neiin, No.12 atangin No.7-ah a invawrh a, he chart top 10-a a lan vawi khatna a ni a, kum 10 vel rimawi khawvela a tal hnuah top 10 kai thei hla a nei ta a ni.
Drake “What Did I Miss?” chu No.2 atangin No.8-ah a tawlh nghal a, Drake hian Hot 100 chart top 10-a lang thei hla 81 nei tawhin, he chart top 10-a lang thei hla ngah ber a ni. Chart No.1 hlui Teddy Swims ‘Lose Control’ chu No.9-ah bawk awm lehin, No.1 hlui bawk Lady Gaga leh Bruno Mars ‘Die With a Smile’ chu top 10 khartu niin, No.10-ah bawk a la awm.
81, Drake
59, Taylor Swift
38, Madonna
35, The Beatles
32, Rihanna
30, Michael Jackson
29, Elton John
28, Mariah Carey
28, Stevie Wonder
27, Justin Bieber
27, Janet Jackson
26, Lil Wayne