Ka hnung amite tan entawn tur tha hnutchhiah hi ka tum – East Tuipui bialtu MLA

Ka hnung amite tan entawn
tur tha hnutchhiah hi ka tum
– East Tuipui bialtu MLA
A bial chhunga hmasawnna hna thawh kawngah a hnunga he bialtu MLA la ni zel tur tan entawn tur tha hnutchhiah chu a duh leh a tum a ni tih East Tuipui bialtu MLA Ramthanmawia chuan a sawi.
Thawhtannia Khawbung Bazar Shed leh VC Hall a hawnnaah MLA chuan, Khawbung khawtlang hmangaihna avanga futsal ground leh bazar shed hawn ruala hawn an tum chu mi thenkhat kawhmawh bawl vangin hawn theih a ni ta loa, a rilru a tina tih a sawi. “He bial leh Khawbung hi ka hmangaih a, retheih huamin ka account phai rawk rawk khawpin ka enkawl a, ka hnung amite tan entawn tur tha hnutchhiah hi ka duh leh tum a ni. In tan in khawtlang tan a ni ka thawh ni. Min thawhpui theih loh pawhin khawngaihin ka kawng hi min dal lo hram rawh u,” a ti.
Bazar Shed leh VC Hall tha tak mai an neih theihna tura a hmun tur phal taka lei tirtute chungah leh Khawbung VC leh building sak hna thawktu Committee chungah a lawm tih a sawi.
Khawbung Bazar shed hi SASCI 2022- 2023 fund cheng nuai 38.97 hmanga sak a ni a. Bazar building hi engineer-ten an ruahman aia zaua sak niin, estimate leh drawing-a tel lo square feet 435-a zau sak belh a ni. A sak hna hi a fund zaah za hman a nih theihnan contractor hnenah pe loin, Khawbung VC kaihhruaiin Bazar Building Committee din a ni a, an ni hian an kutken a, daihzai takin sum hman a ni.
VC Hall hi SASCI 2023- 2024 fund cheng nuai 33.58 hmanga sak a ni a. Bazar Shed chungah sak chhunzawm a ni. Estimate leh drawing-a tel lo square feet 435-a zau sak belh a ni leh bawk. A sak hna hi Bazar Shed sak hna ang bawkin, a fund zaah za hman a nih theihnan Bazar Building Committee-in a kutken a. Daihzai taka sum hman niin, a sum hlep hmang hian Hall thuthleng tur plastic chair 70 leh combo lian lei a ni. A la bang hi a hnuai lungrem ngai remna atan leh sa sahna tur siamna atan hman leh tum a ni a, he hna thawh dan tur hi bialtu MLA ho hian enho nghal a ni.