KA PIAN CHAMPHAPHAK PUALIN

Zoremi Hmar Zote

Oct 11 kha ka piancham a ni a, kum 38 ka pum ta chiah e. Hei leh chen min hruaitu kan Pathian hnenah lawmthu ka sawi mawlh mawlh a, sawi sen loh pawh ka la ba tûn tih ka hria. Keia chanchin teh lul ngaihnawm leh hriat châkawm a awm dawn lul lo tih ka hre na a, ka hrilh tho tho dawn che u!
Naupan lai:
Ka pian hlim chuan ka nu sawi danin ka sâwng hle a ni awm e; a va rapthlak êm! Kaitena min bual châng te pawhin miin sarêp a sil emaw an ti fo a ni awm e. (Ka nu ka khawngaih eee!) Ka kal theih hmain ka tawng thei an ti, ka zak lutuk! Sikul ka luh tirhin ka nu hruai ngai lovin keimahin ka in admit an ti bawk sia, a va zahthlak tak! Sikul kal kha nuam ka ti fâl nalh a, miin min zawh pawhin ‘sikul kal chu a nuam, lehkha zir kher a ngai a, chu chu a nuam lo’ ka ti mai thin, sikulah khan lehkha zir lo ila ka ti thei asin aw. Ngopa khuaa veng chhak sikula kal thin ka ni. A tu a mah kha fai thin kan awm lo. Pathian zarah kan thawveng em em vek. Dâr rik hmaa ui ke tâng chiau vak vak, naktuk pawh ngaihtuah thleng lo tih hriat ngawih ngawiha kûk vak vak leh, home work ti ngai lo bangrela ban kual reng peih si kan ni nuk hlawm. Kan hotu ten ‘hlawhtling lo tur’ an sawi zinga an melh hmasak pawl ka ni fo a, hei, heti mai hi ka ni ta rêng a ni! Insual ka hrât ti tih a, sikulah hotu ten min vua a, inah ka pain. Lui kal ruk ni erawh chuan ka nuin min vaw tlangpui. Pasal ka neih hnu hi chuan ka nu vuak ngaiin vawi hnih chiah ka awm.
Tleirawl lai:
Ka hmel han hmu ula chuan mi ten Oct thla hi hmeltha pian thla a ni e an tih fo hi in awih kher lovang! (Facebook lamah Zoremi Hmar Zote tiin zawng ula, ka hmel a lang!) Tleirawl lai phei chuan pasi pawh thelh khaw khen hnan an tih ang chi ni mai awma mawi, cher chhe ban ve tak, hàng ngaihno bei lo, nachhawkna heh hmel zet ka ni a. Ka dam sen ve lul tho si avangin ka chhungte pawh pasal tur chungchangah an mangang ru viau ang tih pawh ka hai lo. Hmel lamin a zir miau loh avangin a theih ang angin kohhran leh khawtlangah te kan han inhmang chho ve a, chawngzawng fel tala fel ve kha a ngai tlat a ni. Miin, “ A hmeltha lo na a, a fel,” an tih te khan a bak beisei tur chuang nei ta lo chu kan pathlawi mangpui mang nuih ve tak vur vur a! Mitthi thing khawn te, lumen te kha han glow pui theih se tha tur! Kum 15 ka nih laiin love letter ka dawng a, field tlângah ka insualpui.
Nulat lai:
Kum 17 leka pasal nei ka nih avangin ka nulat lai a awm lo a ni!
Pasal neih thu:
|hiante puaraka tang thin. thianho zinga fiamthu thawhtu leh, thiante inngaizawng inhmuh theihna tura an nu leh pate bumsaktua ka tan mek laiin, Aizawl lam atangin min rawn rîm ta tlat mai le! Tlangval virgin kum 30, ruih theih thil ti lo, hna tha tawk tak nei, a bial, a rawng êng lam, nula rim ngai lo, hmeichhe zûna uai mai mai ngai lo, mi thinrim a hmuha nuih za tlat thin, a nuih pawha thir seh nuih ngat a nih avang chuan kei, chhe ve em em tan chuan nu leh pa ten an lo duh ngang mai hi a lo ni a. Malsawmna dawnna a nih tur thu atanga tanin min han thlêm tan a, thu awih thatzia leh dam reina, hlimna leh nitin Dal hmeh-ah an pakai chho…a va den strong tak!
Tichuan lehh…a tawi zawngin, kan tlangvala hmu tur chuan thingtlang nula rorum lutuk, pian nalh lo leh ngil uh mai, hil bel bul, hmel en reng reng pawha ni deuh fuukk mai chu Aizawl zin tur chuan a inbuatsaih ta. A theih ang anga sam henna leh powder diak nena lo tang kawh ve a ni ta bawk a, chhe hle mah se a confi ve tlat! Nu leh pa thu awih a nihna chuan thlamuanna a pe a, hlim lohna chhan tur a nei miah lo! Tluang takin an thleng, an inhmu ta…ka hmuh veleha ka rilrua lo awm nghal chu a chaw ei a tui thinzia tur chu a ni. Nau pian tha leh hrisel, damdawi hming hre tlem tak tur a ni tih ka chiang nghal em em mai. A hmelchhe lo va, tha tih vanga lungphu tirang tur khawp pawh a ni chuang lo, ngaihtuah vang vangin ‘ a zia a zia’ tih ang kha a ni mai. Chu zawng ai chuan a zaidamzia an sawi chu kei mi kawlh leh kawlhrawng, thinchhia leh â bawk si tan chuan a aia tha an awm thei lo!
Inneih thu:
Induh loh thu sawi a awm lo, a inneih theih tihna! Palai an lo kal, an hlawhtling! A hun atan Oct 18, 2002 ruat a ni. Kan innei ta. Inneih zan kan hman dan hi, ka va sawi hreh ve…mahse sawi ang, a rei tawh tho (bleehh) Inhre sa lo, inngaizawng bawk si lo innei thut kan ni ka tih tawh kha. Zan a lo thleng, inleng an tin zo, kan room-a chhuk a hun, het! Tih dan tur ngaihtuah a ngai. Mihring tawng tlem lutuk, biak kher lohva tawng mai mai lo a lo ni kher si, tawng thei lutuk chu keimah; mahse ka zia ka la thup ve duh si, en pawh kan inen hlei thei lo…chutia awm ngawt chu tiin ka va chibai leh tawp mai dawn em mawni ka ti deuh a, mahse inneih zan zana han inchibai tlut tlut chu ni theiin ka hre si lo. Mi hi an inneih zanah an inchibai thin em tih lah zawh nachang ka lo hre si lo, kan zan hmasa bera ka hmai phih zat kha, tu mo mahin min khûm bik hian ka ring lo! Mut a rawt ta…a hur vang bak a ni lovang ka ti… mi râp lutuk…ka mut dawn loh thu ka sawi, dik tak chuan ka chau ve lutuk, a mu ta, a muhil a, kei pawh hnung bêk zawngin, khum sirah, a sir tak meuh meuh-ah ka inthawlh ve ta a. Kan muhil a ni ve ta awm e!
Pathian that vang liau liauin, min hmangaih em emtu pasal ka nei a, fa duhawm tak tak min pe bawk a, nupaah hian keini nupa anga inhau khât leh hlim, nuih heh, uang, insawisa nasa, inkawm ngeih hi an awm ve ang, mahse an tam lovang, a theih loh! Pasal neih hma hi a lo pawi lo, tihian, kan chhungkua hi miin unau ho emaw te min ti mai mai, kan inkawm tawk hlawm a, kan inlungrual phian a nia. Birthday puala ka’n inpuan tak chiam chu!