Zoremi Hmar Zote
-- Advertisement --
Unau 10 zinga upa ber niin a hmingah Lalthanzauva an sa a, koh duat nan ‘Valte’ an ti a; nau pian tha leh duhawm em em a ni an ti. A lo thang lian zel a, duhawmna em em nei zui lem lovin mipa naupang pian tha, harh leh hrisel em em mai a rawn ni chho va.
Mipa naupang dang aiin hnap a ngah hret tih lohah chuan thahrui a ngah fal hle kha a danglamna deuh chu a nimai a. A kawng kal reng reng hi kal pangngaia kal ta mai lo hian heh hnuai lam pet fun hian a tlan thle bawih bawih mai thin. A tan naktuk lungkham a ngai lo va, a tun hun hi a pawimawh ber thin. Chaw ei kham riltam nei tlat thin tih takah fuat a ngah hle a, amah en hian chaw thing leh chi-ah hian vitamin a lo awm ve ngei a ni tih hai rual a awm lo.
Taksa lian duh bik tih takah, a rualpui zingah a chak fâl hle a, ram kal nikhua pawhin mi thing put leta lian pu tlat thin, a hah ve thei lo emaw chu aw tih tur khawpa rit phur chung pawha chhoh tlan fua fua, thiante lawn ngam lohna thing lawn kim vek chi, sava a veh apianga ‘fuh teuh ther ther’ hlir rawn perh thla thin a ni. Thahrui ngah si, tirh nuam leh nau tihnuam tak ni mah se lehkha lam chu a chai thei der lo! A puitlin huna a nih duh an zawh pawh hian ‘rawrawlar khalhtupa’ nih kha a ni ngar ngar a, a thawh fuh deuh tuka a titi a kal tluan viau chuan ‘TMB raivar’ nih te kha a’n tum leh thuak thuak a. An han sawi an han sawi kha chuan Road roller khalh kha chu a chak ber leh nge nge thin.
Zing hma takah ka piin a kai tho va, tukverh bulah ring mangkheng hian a han chhiar lauh lauh a. A zawi telh telh a; a reh a ni tih ka piin a hriat meuh chuan hmuh tur a lo awm tawh ngai lo. Tukverha lawn liama, sava veh tura huan mawng atanga kal ruk daih kha a hnehsawh em em mai a ni. Sikul tlai lo hman tur tawk chiah hian a lo haw thiam em em mai a, “A u, engtin nge lo haw hun tur hi i hriat chat theih a?” tih pawhin, “Ni awm danah a hriat vek alawm, theire kung chung a thlen veleh ka lo haw mai” a ti mai a, khawiah nge theire kung chu a awm a, khawi atangin nge a thlir thin phei chu ka hre chuang lem hlei law. Lehkha zir ai chuan tui chawi te, thing put leh huan thlawh te kha a thlang reng reng a, inrinni apianga inbual kha a tan chuan a zing lutuk fo!
Pawl thum a’n bei nawn phawt aahh… Simple pass-a pawl li a inhlan kai meuh chuan vawi hnih khat mai a fail ta lo. Kum thum zet a’n bei leh fat fat na a, examna-ah sava veh chungchang leh tawlai ke lak dan te, thang kam dan leh tangtial veh dan lam chhuak ngai hek lo; a aw te a lo pawr ve tan ta ruai bawk nen, beidawngin a zirna ninawm leh hrehawm zet chu a chawlh san ta nge nge a. Chutia sikul a’n bang ta chu a thawveng em em mai a, zing hma tak takah thovin duh leh sava a veh a, a duh leh a leng zek zek mai a ni.
Chhun lamah chuan a thiante hovin sikul an kalsan diak thin avangin a khua a har ve deuh thin chuan ka hria. Sikul kal leh chu hlauh tak tein a hlau va, a sikul uniform kawr, a tira var sar, tuna uk ta deuh khak leh a pheikhawk, uluk fe-a ena a dum a ni mai awm mang e tih theih tur chang chang khawpa khawro te, a mawza, a tlang var huk mai leh a ipte, pentui kai nuaih mai, pencil bung leh saihlum a ah pawl nuaihna thin te; a zirlaibu thler uai suau suau mai te chu melh pawh hi a melh peih lo. An sikul, mi ten ‘Esauva’ ti-a an kohna hmun, zirtirtuten inbual tura an nawr haw fona hmun, a nau hmeichhe kawlh leh harh zet a chhan avanga nitin deuhthaw a insual thinna leh ‘hmun ninawm ber’ ti-a a koh thin sikul chu a ngai lo mai a ni lo va, thinlung takin a thlah fel hmiah tih chu rinhlelh rual a awm lo.
A rawn tleirawl chho ve tan a, amah aia u deuh zawkte nula rim a zui ve ta khut khut fo va. A len dawna ka piin rs 2 note pek paha, “Rawn rui utuk lo la” a tih tuma a nui chhing chuaih chuaih te kha ka mitthlaah a cham reng mai. A chak ber chu Motor khalhtupa nih kha a nih miau avangin Aizawl lamah a rawn tei thla ta nge nge a. Hlo thlawh leh hna dang thawk tura piang a nih loh zia, Motor hi a tan liau liaua siam a nih a rin thu min rawn fah nual lai pawh chuan a hna atan Engineer emaw, Doctor emaw ka awh sak lo; Motor chu khalh ngei se ka duhpui em em mai a ni. A zir lai awm pawh kan hriat mang hmain a lo khalh thiam hman reng ta mai reng a. Taxi a khalh thin a, a chak ber leh a tuina ber hna, phur em ema a thawk lai hmel kha hmuh a nuam em em thin.
A tan in leh lo tha a ngai lo va, pawisa ngah lutuk pawh rilru a hah duh ti tlat thin kha a nia. Sumdawng lian pawh an hlim ring lo tlat thin khan hmelthat leh zai thiam phei chu ho a ti! Petrol rim nam vet veta motor hnuaia mut rap te chu a naupan lai ata tawh a chak em em a nih miau avangin, Doctor nih tum a, zir chhuak ta te nen an danglam chuang lo va, an tum, an chak zawng tihlawhtling an ni tho tho mai! Kuhva hring leh zozial ru khelh khawlh pai chunga Aizawl khawpui chhunga tlan kual chu a nun a ni a, a vui lo!
A lo leng a; a rawn thir seh nuih chui chui a, a motor lah chu tawh thiang lo ang mai hian a tifai em em mai bawk a. Theihai pum lian zet mai, eng deuh sur mai pum khat hi a rawn keng vu vu a, min rawn pe chut a, “Mate, han ei mah teh, a thlum ngeih ngawih khawp mai. Pi te zinin an rawn hawn a, ka ei veleh i ta tur ka la ve nghal a, ‘Pi, ka nau ka pe ve dawn’ ka tiah, piin a phal rass” a ti hluam hluam a. A ni reng lah tak a, kan naupan lai pawhin ka tel lo hian fu chang khat pawh a fep duh thin lo va. Piang hmun kan ni lo na a, a pianpuite ngei ai pawhin min duat fe tlat a ni. Hauh leh vuak ka tawrh ai a tuar vek duh a, keima tihsualah ngei pawh a hnungzang a dawh fo mai. Nu te unau kan ni a, ka pi te inah kan naupan zual laiin kan awm dun a ni. “Ka nau” a tih chuan keimah a sawina a ni a, a nau dang pakua zette chu an hmingin a sawi mai thin.
|um khat chu Chaltlang chho-a ka tlan laiin, side lehlam chu an jam nasa mai a. Ka tlanna lam pawh tlan chak theih a ni bik lo. Muangchanga ka tlan chhoh lai chuan ka aw hriat thin, tham tial deuh tuak, ka u aw ngei mai chuan “Mateee” a rawn ti ta liah liah mai a! Ka va hawi phei nak chuan keima u ngei mai kha kuhva hmuam tûn chung chuan a lo nui full pup mai a! A nuih reng reng hian a mit hi a chhing deuh vek thin bawk nen, a keh hian a lo keh vel chuaih a ni ber mai. (Ka mitthla-ah a lo lang)
Kei lah chuan, “E heee…aa uu” ka lo ti ve bawk a. Han din mai na tur awm bawk si lo nen, kei lah kal hret hret pah ngai, ani lah tawlh ve zel ngai bawk nen, kan inbiak thui hmain kan inhmu pha lo dawn ta thuai a. Kan hnunga mite lah chuan horn an hmet tuarh tuarh a, unau inngai em em, hun rei tak inhmu tawh lote rilru reng an hriatpui ve lo. Mittui tling kiaua ka bye-bye liap liap, min rawn vai let ve luap luap kha a dam chhunga ka hmuh tawpna tur a ni tih reng ka hre lo!
Ka u, ka tah changa min tahpuitu, ka tuar ai tuar a, keimah vanga hun harsa leh hrehawm tam tak paltlang fotu, ka ninhlei leh harh luat, kawlh luat vanga mi tam tak insualpui thin, ka tel lova chhang per khat pawh ei duh lo thin ka u kha! Ka hmuh leh meuh chuan min lo en ve tawh lo va, au mah ila min chhang hek lo.
Ka ngaih thu ka hrilh te chu a bengkhawn duh miah lo va, a biang vawt ngiai chul chunga ka koh pawhin min ngaihsak tawh hek lo. A hmel hlim tak chu ka en a, a chhuahsan tak lei hrehawm hi hnutiang a chhawn takzet a, a lo kir leh chak hauh lo bawk ang tih ka hria. Tunah hian van hmun nuam atang khan min lo thlir ve a nih chuan maw; ka ngai lutuk che aw…Au Valte!