Kalkawng chhia leh Consumer Problem Plus Fridge Replacement thu

Lallunghnema
Charity Lodge
Cont: 9862288182

Consumer issue leh Inkal pawhna kawng (road communication) hian inzawmna thûk tak an nei a. Consumer- te hnuk khawih tam tak a awm mai ni lovin, ‘thil zawng zawng’ a nghawng kan ti thei hial âwm e. Mi tin nunah a bet tlat a. Thil lei leh hralh tur zin kawng a ni a. Kalkawng a that loh chuan bungrua a che sawn thei lova, bungrua chu a thlen hunah a thleng thei lova. Chutichuan, thil a ti vâng(scarce) a, thil lei tur leh zawrh tur a tlêm phah a, a tlêm mai piah lamah a awm lo fo thin a ni. Nghei tawp mai chu mi tam tak hma bak a ni thin. Chhungkaw nun a hautak satliah lova, tuarna a tling zel a ni.
Chuvangin Consumer thil hi a theu neu lo hle a. Nam nûl ngawt theih a ni hek lo. He India ram ropui taka mipui chhawr tangkai tur Dan tha tak mai, Consumer Protection Act 2019 a awm chhûng chuan mipuiten invenna kulh bîng sâng kan nei reng dawn a ni.
Furpui laiin kawng a chhia a, kawng a ping a, bungrua a thleng tha thei lova; bungrua a vâng a, thil man a to phah a. Helai tak hi Consumer-te tuarna lo thleng thin a ni. Black marketing a nasat phah a. Chumi piah lamah chuan bungrua hman tlak loh leh chhia a tam phah a. Consumer ten an tuar ta thin a ni. Consumer te tuarna hi heng thil vanduaithlak, khuarel chhiatna avang hian a lo awm a. Consumer – in a tuar chuan khawtlang, hnam leh ramin kan tuar tihna a ni.
Keini ram chang ni lovin khawi ram pawhin a mamawh chu inkal pawhna tha hi a ni a. Inkal pawhna kawng tha hi englai pawhin kan neih reng tur a ni. Mualkhang Sairang Road te kan sawi a. A siam tura thawktute pawh Minister leh MLA rual ho niin an in-duty chhawk tih a ni. Kalkawng pawh a tha tluan lem lo a ni awm e. Chak khai phur pawl pawhin sawrkar nawrin theihtawpin an la a ni. Ni tin, darkar tina Consumer nghawng chu LP Gas – te, Buhfai te, Tuialhthei leh ei lam leh hman tur lam ‘supply’ a ni a.
Chuvangin ‘Consumer’ te hi a tuartu kan ni a, Consumer tuarna chu mipui tuarna leh ram chhung tuarna a ni thin. Sawrkar hi englai pawhin a inring reng tur a ni a. Mipui tuarna thleng lo thei ang bera humhalh hi Sawrkar thuneitute hmalakna tur ngai lo, Minister leh MLA – ten kawng siam an invil chhawk zar zar mai ringawt pawh hi pui tak chu a ni. Mahse thla tam pawh a ral hmain ‘Awi Lalpa a ngai bawk’, tih chu kan hmachhawn tur a lo ni leh thin. A hahthlâk viau a ni.
Ka Article hnuhnung ber (chu chu October ni 17 a mi, ka tihna a ni) khan ka Consumer chet velnaa ka tawn hriat laklawh deuh maiin ka rawn pho chhuak a. Tunah hian kan chhunzawm dawn a ni.
Ni khat chu nu pakhat hian mangang aw tak hian a thil lei hman theih loh a buaipui nasat thu leh replacement a tih theih nana hmalakpuiah min ngen chiam mai a. He nu khawngaihthlak tak hian Advocate fel tak pakhatin kei ve mai mai hi pan tura a kawhhmuh thu min hrilh bawk a.
Kei chuan heti hian ka ti a, “Nia, uang pui chang lo ila, hei thil leitu leh hmangtu eng emaw zat kan lo buaipui tawh thin a. Beisei engmah kan nei ngai lova. Hmel hriat loh hi kan lo hmelhriat puih mai thin a. Chutiang kan han thawhho hnu chuan kan inthian tha chho zel mai bawk. A hnûah kan inhmelhriat ve mai a ni …’ ti hian ka lo register ve ang che a. A tahtawlin ka buaipui a, kan lo ûmzuisak dawn che nia. Kan hlawhtlinpui ang che, tih kan tiam thei lo che a. Theihtawp kan lo chhuahsak phawt ang che. Sumdawng tha leh tha lo inkar hi a zau hle thin,’ tiin kan inbiakna chu kan titawp ta rih a. He nu mangang tanpui ngai tak hian tanpuitu a mamawh a ni ber e.. ka hriat duh, mamawh zawng zawng (document) min pek hnu chuan, ka tih dan thin angin hreh ang reng, phur vak lo chungin chu suumdawng dawrkai (an manager) chu ka va biaksak ta a. Manager pawh hian min lo dawngsawng tha hle mai.
Keimah : Lallunghnema, Consumer Activist ka nia. Tunah hian Centre For Consumer Education Chairman ka niin tun hma kum 20 vel kal taah khan Aizawl Dist. Consumer Forum-ah member ka ni ve tawh a. President charge – pawh lain complaint ka lo buaipui tawh a. He Forum-a ka awm loh chin atanga tun hun thleng hian thil leitu leh service(mî thâ leh zung) hmangtute zinga harsatna tawk mangang ka lo pui thin a. Kha in fridge leitu Pi Zoremi harsatna chungchangah khan min pun avangin ka be duh che a nia! Replacement chu in tihsak thei dawn tawh em! In tihfelsak thuai loh chuan Consuner Protection Act 2019 bawhchhiatna a ni thei a. An lungawi vak tawh lo a ni. Consumer Court-a an khin che chuan thiam loh in chang ngei dawn a. He Act-in a sawi ang hian consumer a ni a, dikna leh chanvo a nei a ni.
A tawi zawngiin sawi mai ila..
Manager : Naktukah kan lo replace – sak ang e, lo kal rawh se.
A tukah chuan he nu khawngaihthlak hi va kal a, replcement chu October ni 13 (Thawhtanni) khan an lo tihsak ta a ni. Ani consumer a lawm hle a. Kei pawh ka lawm a ni.
Hetiang thu, kan hmalakna, kan hlawhtlinna eng eng emaw ka han pho chhuah hian chhan tha tak a nei…chu chu consumer awareness a ni. Intihlar lam a kâwk lo e, thianpa! Min lo hriatsak dawn nia.
Consumer right hriat loh hi atna chi khat a ni a.
Consumer right hriat loh hi changkan lohna chi khat a ni bawk.
Mîin fing inti mah se, Consumer right a hriat loh chuan mi finga chhiar theih a ni ngai lo!