Kalphung hlui leh mipui…

UT atanga chhiarin mahnia inrelbawl hranga kan awm hun chhung hi kum 50 zet chu a ni ve ta. Kum 50 kalta chhung khan inthlanpui vawi tam tak kan hmachhawn a, inthlan dawn boruaka politician-te campaign dan lar tak pakhat chu, ‘khingpuite sawi chhiat’ kha a ni, kan ti thei awm e.
Candidate pakhatin dandidate dang chanchin maksak tak tak a phawrh chhuak a, a lehlamin a sawifiah a, chu chu mipuiin mak tiin an thlir thup a, tunge dik zawk ta ang tih ringawt mai kha hriat an chak a, chu chu an bengkhawn ber a ni ta thin a; ram leh hnam kaihhruai tum dan lam aiin mimal inbeihna boruak khan ngaihven a hlawh ta daih thin a, khatiang inbeihna karah khan mipuite kha hruai bovin an awm a, a tawpah phei chuan ram leh hnam inkaihhruai dan tur lam manifesto/policy chungchang aiin ‘a lo chuti/khati hle mai a, ka vote tawp lovang…’ tih kha mipuiin patla an khai dan a ni ta mai thin a. Khatiang kara hruaitu thlang mai thin kan nihna kha kan ram dinhmunah hian a lang ta zel ni mai awmin a ngaih theih.
Khatiang zia kha tunah hian kan kalsan vang vang ta em le? Chu chu mipuite hian kan ngaihtuah chian atan a pawimawh ta khawp mai.
Tunhma ai kha chuan inthlan boruakah politician leh mipuite pawhin hma chu kan sawn ta khawp mai. Khawvel thiamna kan chhawr tangkai chho zel a, tunhmaa khawlaia thusawi vak vak te, in tina lut lawra campaign angte kha a awm ta meuh lo. Social media kan hmang tangkai ta zawk a, mipui sukthlek pawh a danglam tawh.
Hetih lai hian, tunhmaa kalphung hlui zia ang kha kan seng lut leh dawn ta em ni tih turin, mimal inbeihna lam a vung chho leh tan mek niin a lang. Hetiang boruak hi mipui hian kan thlir thiam a pawimawh dawn a. A sawi hnuhnung zawk apiang thu dik zawk anga ngaih mai hi thil awm thei a ni; chuvangin, mi sawiah innghat pumhlum lova, mahni ngeiin thil kalphung leh awmzia ngun taka kan chik peih ve a pawimawh thin a ni.