KUHVA BAWK AW

By H Lalchhuanliana
Myanmar atanga dan lo va Kuhva lo lut hi hun rei tak atang khan kan harsatna tawh a la ni reng a, a khamawm ta hle mai. Kan mithiam tam takte pawhin dan lo va lo lut a nih thute leh zalen taka a lo lut reng hi dan leh thupek ken kawh kawnga Sawrkar a hlawhchhamzia lanna a nih thu an sawi chamchi a nih kha. Kan sawrkar pawhin dan lo a ni tih hre reng chunga mi tam takin eizawnnan an lo hman vanga mit an lo siai khum thute, tun hnua an khap thute thlengin tlang takin an sawi a nih kha. Central atang pawha dan lo va kuhva hi lo lut a nihzia leh titawp tura hma la tura Mizoram sawrkar pawh a hriattir thu thlengin kan dawng bawk a. Hemi kawnga hma latu Champhai DC chu dan bawhchhetu zawk nia ngaih FIR hmangin case siamsak a ni a, dan lova kuhva neitu ni a sawite chunga FIR erawh kha chu a hlamzuih ta hlauh thung niin an sawi a, dik tak maw le!
Kuhva hrim hrim hi amah ngawtin sual a ni hauh lo, a pawi lai tak chu dan pawisak lohna lai tak hi a ni. Sawrkar berin a khap tak tak loh avanga hlawknana lo hmangtute pawh hian dan lo a ni tih an hriat hnu hi chuan sim tawh teh se. Kan rama kuhva huan nei mi tam takte harsatna siamtu an niin kuhva mai ni lo, a phurtu motor thlenga hal a ni thinte leh, mizo leh mizo inhmelmakna siam theitu a ni tih hriain, dan hi i pawisa tlang hram hram teh ang u. Mahni hlawkna ringawt ngaihtuaha dan bawhchhiat luihna hi kan ram hmelma dik tak a ni tih hi i hre thar teh ang u. Bible chuan Sual chu “Dan bawhchhiatna” (1Johana 3:4) a ti a, thuawihlohna, helna tite pawhin sawi a ni bawk. Hei bakah hian kan Police chhuanvawr em em thinte thlengin rin an kai ta lo va, nasa taka dem an hlawh phah hi a pawi takzet a ni. Kan sawrkar hi dan kenkawhna lamah hian dul deuhna chhan a nei nge , kan Police duty-te an duty hnan tih thawm han hriatte hian rilru a ti na hle a ni.
Hachhek bial kuhva chingtu pawlte leh Mizoram Truck Driver leh Tipper Driver &Owner hruaitute thuchhuak hian engkim a hril mai awm e:-
HACHHEK BIAL KUHVA CHINGTU PAWL THUCHHUAH (No.10/23)
INKAWM HONA TLUANG
TAKIN KAN NEI.
Vawiin (15/7/23-Sat) khan Zamuang Arecanut Growers’ Co-operative Society Ltd. Office ah Pu C.Lalzarliana, Adviser to Mizoram Tripper Drivers & Owners Association leh Pu G.Rama, Mizoram Truck Driver Association aiawhte lo kalin inkawmna hun tha tak kan nei a, He hun hi Pu H.Biakvullura, President, HBKCP chuan a kaihruai a, tlang tak leh inpawh tlang takin thu sawiho a ni.
MTDOA lam chuan Dan lova Kuhva ro tawlh vanga Mizo Drivers ten harsatna an lo tawh thin tawh avangin tih tawp hmak ni thei se an duh thu an sawi a, Sorkar lamah pawh an lo bei ve tawh thin tih an sawi. Lirthei kang tel thin chungchangah chuan awmze nei zawka ngun taka ngaihtuah turin min ngen a, Custom lama hremna an tawrh nasat thin dan leh Motor Life Insurance azira Sum leh pai chawi a insan hleih dante min hrilhfiah a. “Dan lova Kuhva lo lut reng reng tihtawp hmak hi kan duh ber a ni. HBKCP hmalakna kan thlawp zel ang che u,” an ti.
MTDOA leh MTDA zingah Kuhva ro phurh duh miah lo hi an tam a, tuna la phur reng hi chu mi 20/1 bak an nih loh thu sawiin, “Dan phal loh Kuhva phurh tur a lo awm lirthei neitu leh khalhtu moral a ti chhia a, taima taka hnathawka thawhrah seng tur kan nih lai a, hun rei lo tea Sum hmuh thut theihna hian min ti thatchhe zo tawh a ni. He Kuhva tawlh hian Mizoram a paltlang chuan a hlawkna tak tak teltu chu Mizoram leilung fate ni lovin, VAI bawk an ni leh thin si a. Hei hi tawp hmak se kan duh ber a ni,” an ti.
An sawi zelnaah, “He Dan phal loh Kuhva tawlh chungchanga a mawhphurtu lian ber leh thiam lo ber chu POLICE hi an ni a tih loh theih loh, kan Police-te hian ram leilung fate hamthatna ngaihtuahin, dik lo taka thil tite ven kawng dan dik takin hna thawk se, hetiang harsatna kan tawk lo vang,” an ti hmiah mai a ni.
HBKCP lam aiawhte pawhin kan harsatna te, lirthei kang a lo awm leh thin dante sawifiahin, “Warning kan pek tawh ngeite pawhin an la rawn kalpui leh thin hi, mipui lamin inrunluihna leh inngaihnepna ang hialah kan ngai tawh a ni, hruaitute dinhmun atang chuan a luhai thlak a, mipui thinurna hi a nep tawh lo a ni,” tiin kan sawi bawk.
Lirthei neitu leh Khalhtu lam aiawhte pawhin HBKCP hmalakna vanga Dan lova Kuhva phurh a tlem sawt ziate sawiin, “Dan phal loh Kuhva phurh a tawp theihnan theihtawp kan lo chhuah zel ang,” tiin rilru dam taka inthlah tawnin tlai dar 3:54 ah inkawm hona hi kan titawp a ni.
Sd/-
(LALREMRUATA KHIANGTE)
General Secretary.