Kan boruak a kang zel – Ronald Sapa Tlau

India ramah Congress party boruak a kang zel a, Mizoramah pawh inlungrual leh taima taka an kal chuan an kutah sawrkarna a awm leh dawn tih Congress vice president Ronald Sapa Tlau chuan a sawi.
Zirtawpnia Congress Bhavan-a inkhawmah MPCC vice president chuan, central lamah nitin an party boruak a eng tial tial a, Haryana-ah chuan BJP-in sawrkarna siam phak tawh si loin dik lo takin sawrkarna a la kalpui hram hram tih a sawi. “India ramah hian kan boruak a kang zel a. Theihtawp chhuah ila, inlungrual taka kan kal chuan sawrkarna hi kan chang leh dawn a ni,” a ti.
ZPM sawrkarin thlai pali lei a tum zingah hmunphiah lei a lo tul ta a. SEDP sum hman bang pawh a awm nia sawi ni mah se, an lei ta loa, hmunphiah chingtute beidawng takin an siam a, an rilru a na hle tih a sawi.
Chief minister-in portfolio a nei loang tih te, minister-in lirthei pakhat chauh an kawl ang, tih te chu a tak a chang ta lo a. Val Upa Council pawhin thu an nei tak tak lo niin miten an ngai tih Ronald Sapa hian sawiin, “Mipuiah beiseina sang tak an siam a, kalphung thar, tiin mipui thinlung an hneh a. Mah se, mipui beisei an pha ta lo. An kal chhoh zel danah hian term khat bak hi mipui hian an daih an ring lo. Chuvangin keimahni ho hian mi tamtak tan kawngka kan lo hawn a, kan lo dawlzawh a ngai a, chutiang tur chuan kan inbuatsaih a ngai a ni,” a ti.