Kan buainaah khan mi 5,000 vel thah an ni – Iran thuneitu

Kan buainaah khan mi 5,000 vel thah an ni – Iran thuneitu
Iran thuneitu sang chuan tun hnaia an rama mipuiin lungawi lohna an lantirah venhim hna thawktu mi 500 chuang telin mi 5,000 vel thah an ni tih a sawi a, ‘mi firfiak leh ralthuam kenga che chhuak’ nia a sawiten ‘pawisawi lo Iranian-te an that’ niin a sawi bawk.
An ram eibar dinhmun chhe lutuk avanga December 28 atanga lungawi lohna lantir tan hi a hnuah puithiam rorelna hnuaia awm duh lohnaah a chang zui a, kum 1979-a Islamic revolution hnua Iran-a mipuiten buaina an siam len ber a tling.
US President Donald Trump-a chuan khawlaiah lungawi loh lantirtute thah an nih zel chauh inrawlhah a vau reng a. Zirtawpni khan social media-ah Tehran-a hruaituten mi 800 an tihhlum an tihtawp avangin lawm thu sawina a tar lang thung.
A tukah Supreme Leader Ayatollah Ali Khamenei-a chuan Trump-a chu Iran-a mipui lungawi lote lamtanga a a fuih avangin ‘mi sual’ tiin a sawi zui.
“Ram hi indonaah kan hruai lut dawn lo va; mahse, ram chhung emaw, ram dang mi emaw pawh ni se mi sual chu hrem lohvin kan chhuah dawn lo,” tiin Khamenei-achuan a sawi a. US leh Israel nena inkungkaihna nei ‘firfiak leh ralthuam kengte’ avangin ‘mi sang tel an thi’ tih a sawi bawk.
US-a mihring dikna chanvo humhalhtu pawl, HRANA chuan Inrinni khan thi hi 3,308 an nih thu leh a dang 4,382 chu an thih chhan en zui mek a nih thu a sawi a. Mi 24,000 chuang man an ni bawk.
Iranian thuneitu hian thi zat hi ‘a pun thut’ a rinawm loh tih a sawi a, ‘Israel leh ram danga awm hel pawlten’ khawlaia chhuakte hi ralthuamin an pui niin a sawi bawk.
Puithiam rorelna ram hian a hmelma kumhlun, US leh Israel hi an ram buainaah hian a puh nasa a, Islamic Republic hi ram pahnihte hian June thla khan an kap nghe nghe.
Lungawi loh lantirtute hi tharuma beih let an nih thu hi sawi a tam a. Social media-a video darhah pawh hmuh tur a awm a, hengte hi a taka thleng ngei a ni tih pawh finfiah a ni hlawm.
Iranian thuneitu sang pakhat, a hming sawi lang duh loh chuan buaina leh thihna thlen tamna ber chu an ram hmarthlanga Iranian Kurdish-te chen tamna lai niin a sawi.
Kurdish inlakhran tum pawlte hi an la tam a, buainaah pawh hian tharum hmang zawngin an che nasa hle a ni.
Reuters chuan Nilaini pawh khan Kurdish inlak hran tum pawla tel, ralthuam neiten Iraq atanga Iran luh a tum niin a lo tar lang tawh.
Norway-a Iranian Kurdish dikna chanvo humhalhtu, Hengaw pawhin December thla tawpah khan Kurdish-te chenna laiah hian sorkar laka lungawi lote pun khawmnaah tharum thawhna a nasa tih a lo sawi tawh.
Iran-a thil thleng zawng zawng hi internet tihthih avangin hriat vek a harsa a, Inrinni zing atang khan hmun tlemah erawh tihnun leh tawh a ni.