Kan hmathlir tihlawhtling turin theihtawp kan chhuah – CM

Ram tana an hmathlir tihlawhtling turin theihtawpi chhuahin hma an la tih chief minister Zoramthanga chuan a sawi.
Hnahthiala Deputy Commissioner Office Complex sak hna thawh mek leh PWD Complex-a Circuit House sakna tur hmun chu Thawhlehni khan chief minister hian a enfiah a. Ram changkang leh upa tak tak, kum za tel hmasawnna lo kalpui tawhnate anga kan ram siam ve tur chuan kum hnih khat chauh a tawk lo a, ram hma kan sawn tir theih dan tur hmathlir (vision) thui tak nen erawh chuan thahnemngai taka beiin, ram entawntlakah kan la siam thei tih a sawi. Chu hmathlir tihlawhtling tur chuan tunah pawh theihtawp chhuaha hma lak zel a ni, tiin, “Ram hmasawnna atan a ram neitute chu a enkawltu kan nih a pawimawh a; hnam thinlung put hi kan ramin a mamawh. Ram siamtha tur chuan ram mi leh sa bak kan awmloh avangin ram mipui te ram hmangaihna nen kan thawh ho zel a pawimawh a ni,” a ti.
Chief minister chuan Hnahthial khawpui chu district headquarter entawntlak taka siam tum a ni, tiin, district thar puan a nih hnu ah sawrkar chuan DC office dinna tur district thar pathum tan cheng vaibelchhe 10 theuh a dah a, harsatna hrang hrang karah theihtawpa hma lak zel a ni tih a sawi. Heng district thar pathuma hmalakna te a enpui dan leh a daihzai zawnga DC hmunhma chu office pakhat aia tam ten an hman tangkai tura ruahman a tul thu te, khawtlang mipui pawhin thahnemngai taka an khua leh district hmasawnna turah an lo tawiawm zel a pawimawh thu te a sawi a ni.
PWD engineer leh architect te nen Circuit House sakna tur hmunhma an enfiah nghal a. DC office-a thawktute nen an inkawm bawk.
Hnahthial DC Complex-ah hian DC office bakah Revenue leh Information & Communication Technology an awm a. A bulah UD&PA office awmin, a bulhnai sawrkar ramah department dang office sak tura ruahman zel a ni.