KAN RAM HIAN HARHNA A MAMAWH

Reuben Lalnunthara Hnamte

Thlarauva khah hi ringtu leh rawngbawltu tan hian alo pawimawh takzet a. Kohhran pawh hi Pathian din leh buatsaih a ni a, thlarauva a khah a tul khawp mai. Tunlai hunah Biak in tha leh Kohhran hausa nih hi kan intlansiak nasa tawh hle mai a. Pathian ram thilpekte pung zelin kohhran hi a hausa tih loh rual a ni lo. Chutih rualin Thlarauva khahna lam hi kan tlachham ta hle niin a lang a; dan ang maia kal leh rawngbawlna hi kohhran hrang hrangah a tam ta hle a ni. Kohhran hruaituteah lah Thlarauva khat lem lo, inkhawm peih tak, neinung ve khat bawk si, kohhrana tangkai an pung zel a. Nimahsela, Thlarauva khahna tak hi kan tlachham ta hle mai thung. Camping leh crusade chu kohhran hrang hrang hian kan nei deuh reng a, retreat lah kan ti chamchi bawk. Mahse, Thlarau khat kohhran hmuh tur kan vang ta hle; ropuina lamah te hausakna lamahte kan insawrbing ta em ni ang tih mai tur a ni zo tawh.
Tirhkohte thiltih han chhiar hian Pathianin a ngaihpawimawh ber chu Thlarauva khahna hi a ni a. Tin, an tawngtai zawhin an awmkhawmna chu a lo nghing a, ‘an zain Thlarau Thianghlimin an lo khat a,’ huai takin Pathian thu an hril ta a. (Tirhkohte 4:31) Lal Isua pawh khan van alawn dawn khan a chah ngun ber chu Thlarauva an khah phawt a pawimawh zia kha a ni. Kohhran tinah rawngbawltu Thlarauva khat si lo kan pung tual tual a, mi neinung leh milian deuhte an tlatlum tual tual bawk. Thlarau mi, Pathian tih mi nisi, khawvel thila awmthei leh neinung ni lem lo te chu sirah hnawlin an awm a, mi hausa leh ropui deuh lo tan chuan kohhranahte pawh tlaktlum a har ta hle. Lal Isua ngaih pawimawh ber Thlarauva khahna hi sirah kan hnawl ta em ni tih mai tur a ni ta a. Mi ahauhsakna hriat lem loh, sorkar hnaah pawha hmingtha lem lote pawh mi chaltlang an nih chuan kohhran chuan kan tlawn huam ta mai a nih hi. Hetianga kohhrante hi a kal zel chuan Thlarau Thianghlim hian kohhran hi a hlat tual tual ang a, a hausa hle anga, a ro tual tual bawk ang.
Kohhran hruaitu tawngtai mi, Pathian tih mi, Thlarauva khat hi kan va mamawh em kan ram hian. |halai hruaitu tawngtai mi, Thlarauva khat hi thalaite hian an va mamawh em! Isua zirtirte anga tawngtai mi leh Thlarauva khat mi kohhran hruaitu leh Thalai hruaitute hi nei ta ila chuan khawi kohhran mai pawh hi ava nuamin, avan hlim dawn tehreng ve le! Kohhran hi khawvel ropuina leh sum leh paia chawm tum tur a ni lova, Thlarauva chawm a ni tur a ni a, chu chu a innghahna lungphum a ni. Tunlai khawvelah chuan khawvel hian kohhran hi a hnuk kal tawh a ang ber mai. Lal Isuan “Hêng thu hi in hnênah ka sawi tawh hi, keimahah hian inthlamuanna tûrin. Khawvêlah hian hrehawmin in awm thîn; nimahsela, thlamuang takin awm rawh u, keiin khawvêl ka ngam ta,” a ti a(Johana. 16:32-33) a tih chu tunlai kohhranah hi chuan hla tak a ni. Lal Isua’n khawvel a ngam tawh , keini kohhran hruaitu leh Thalai hruaitute pawh hian khawvel kan ngam ve em?
Kohhran hruaitu, |halai hruaitu khawvel ngam lo, khawvelin a a duh duha a hnuhkal kan tam lutuk hian kohhrana kan rawngbawlna pawh a tinung lova, Thlarauvin kan khat theilo a nih hi. Nihna leh ropuina kan duh si a, chu mi khel reng reng chuan kan khawsa a, hei vang hian kohhran tin mai hi a mutthlu deuh thup mai a ni. Zakaia anga simna tak tak kan nei duh hek lo; mi thenkhat hi chuan khawvel ropuina leh duhamna nena chawhpawlh hian a lemin rawng kan bawl a ni. Thlarau Thianghlim hnathawh hi lam leh emotion zawnga chet ngawt a ni lo; khawvel sualna lak atanga inlak hranna, khawvel hnehna, simna tak tak zawk kha a ni. Emotion te., làm te chu a keng tel ve chauh zawk a ni. Thlarau atangin khawvel hi hneh ang u hmiang, i hnuk zawk ang u. Isua zirtir Petera leh a thiante’n Thlarau Thianghlim an han chan meuh kha chuan an nun chu a danglam daih a, an huaisen a, thlarauvin an khat a, thiltihtheihnain a thuam a, khawvel ngam tawh loh nun chu an nunah a lo lang a ni.
Ram hruaitute, Sorkar Department hrang hrangte pawh hian harhna an mamawh a ni. Kan ram zimte hi hman atang khan kan ram Budgette hi a nihna taka hmang ila chuan kan ram hi amah Pu.Zoramthanga Ex. Chief Minister tawngkam takin Switzerland of the East kan ni tawh hial maithei sin. Winston Churchilla chuan “ Hmasawnna chu insiamthat hi a ni a, famkimna chu insiamthat fo mai hi a ni” a lo ti thin. Kan ram hmasawnna tur chuan insiamthat fo mai hi kan mamawh a, chu mi tur chuan simna tak harhna kan ngai a ni. A dik tak chuan Pathian leh kan ram hi kan tawngka chiah hian em ni kan hmangaih tih mai tur a ni thin. A nihna takah chuan kan thlakhat hlawh te hi chu eng anga Officer lian pawh nise hauhsak thur thurna tur hi a awm lo. Sum hi kan Pathian hlawm tawh a, duhamna hi kan pianpui tawh emaw tih mai tur a ni. Pathian thu chuan duhamna chu milem biakna nen a in ang reng a ti a nih kha. Ringtu inti si milembia kan lo tam awm mange. Chuvangin kan ram hian Zakaia anga simna nun tak tak, a hlepruk pawh a let li a rul duh khawpa simna tak kha kan mamawh. Kohhran pawh hi a inenlet a ngai, khawvel; hian kohhran hi a hnuk kal tur a ni lova, kohhran hian khawvel hi a hnuk tur a ni zawk.
America rama |halaite zinga harhna thleng chu a la tawp mai lo, hmun dang dangah a kangkai zel a ni. Kan ramah pawh |halaite zingah harhna thleng ve se ka va ti em! |halaite te hi a hmahruaitu i ni ang u; tawngtaiin, chawngheiin tihtakzetin Lalpa i au ang u. Kan ram thalai tam takte, ruihhlo, ruk ruk, hmeichhiat mipatna bawihah tam tak an tang mek; heng mite chhanchhuak tur hian kan ramah harhna a thlen a ngai. Thalai tam tak chhantu ngaiin an rum a, Setana chuan hun tlemte chauh a nei tawh tih inhriain nasa takin tan a la a, chung mite chhanchhuak tur chuan kan penchhuah a ngai a ni. Chumi tur erawh chuan keimahniah simnate, harhna tak a thlen hmasak a ngai. Kan khawvel hi sualna, indona, chhiatnain a khat zo tawh; Krista avanga hrehawm tuara martarten Lalpa an auva, Amah avanga hrehawm tak tuartute tahna hi Lalpa’n ngaihthalk leh hmuh hrehawm a ti em em a ni. Khawvel hi kan kumhlunna tur a ni lova, Vanramah Thlarau bo tam tak kan hruai theih nan Thalaite u Lalpa tan i pen chhuak ila; hma ihruai ila, huaisennate, chaknate, thiltihtheihnate kan neih theih nan Thlarauva khata kan awm theih nan tihtakzetin Lalpa i au ang u.