KAN RAM POLITICS-AH KOHHRAN A PAWIMAWH FO

H.Lalchhuanliana

Kan Kohhran Puithiamte, pehel nei lova hetiang taka an au chhuah hi a la awm zen zen awm lo ve.Anni bakah hian Revival Speaker hrang hrang, MPF leh Synod Social Front rualte Mizoram dung leh vangah rorelna dik a awm theihnan an au reng bawk a nih kha. Ram rorelna kan kalpui dan a dik tawk lo va, Kohhran leh Ngos thlengin an vei a, Kohhran puithiamte a ruh langin an au chhuak ta kha a ni ber mai. Chuti chung chuan kan ram roreltute berin pawisa hmanga lal leh tumin, MLA bial tin chu SEDP pawisa emaw, SASCI emaw, Party fund atangin emaw a tul dan angin an vil tur thu an la sawi reng bawk a. Hei hi an tihsual lian tak leh Kohhran aw ngaih pawimawh tawk lohna pawh niin a lang. LMC , Lunglei inthlanah leh LC bye electionah te khan pawisa chakna hmanga MLA election hmachhawn tumtute chu an tla ta phawk phawk a nih kha.MLA electiona rorelna an chan zui lohna chhan pawh kha kan Sakhaw puithiamte leh Kohhran ten rorelna dik an sawi khi an zawm loh vang a ni thei em tih hi ngaihtuah tham tak a ni awm e.
Hemi thu ka sawi hian MNF ministry kalta kha ka demna ngawr ngawr a ni lo va, khati khawpa Kohhran leh mipui
boruak inmung an man pha lo/ duh lo ni a langte kha an inenletnan hmang se ka duhpui vang zawk a ni. Pawisaa inlei tlin tumte, kut tling lova sum sem leh dawnte hi reh tawh se, tih hi Synod rorelna sangah pawh an lo sawi ho tawh a ni. Kristian ramah chuan Krista zirtirna mila dik taka rorelna kalpui hi malsawmna hnar pawh a ni ngei ang.
ZPM hruai sawrkar thar pawh hian rorelna an chan chhan hi an party chakna a ni lo tih an hriat a tul ang .A tum khatna atan Sawrkarna an chang ve a ni a, kawng thar an la zawh ngai loh an zawh tan mek a ni. An intiam ang ngeiin eirukna laka fihlimte, kalphung thara kala, Sem policy aiah Thawhrimna hmanga inkaih chhuah, party bil sawrkar aiah mipui huap zo sawrkar din an tumnate kha mipui leh Kohhran thlengin kan beisei leh nghahfak a ni tih hre reng se.An thil tum ang diak diak chu an ti hauh lo ang, mahse eirukna laka an fihlim a, rim taka kut hnathawktute laka an tih tum hi an hlen chuan kalphung thar chu a ni phawt ang. An hmaa roreltute lo tih dik loh a awm a nih pawhin dan hnuaiah huaisen takin tih dik hna thawk mai se, ram tana tha turah chuan danglam ngam ngei teh se.Kohhran hruaitute hian kan ram roreltu thlan thar apiang te hi lenga sawmin an tawngtaisak thin a, rorelna dik kalpui turin an fuih thin a ni.Hei bakah pawh kan CM te chu lenchilhin ram rorelna dik ni a an hriat kalpui turin thurawn an pe thin a, a lawmawm hle a ni.Hei hian ram rorelna leh Kohhrana rawngbawlna hi kan Bible zirtirna mila rual taka kal kawp tur a nih zia a tilang hle awm e.
Mipui lam pawh hian roreltute thu zawm tur kan nih hi hre reng ila, dan zawm hi mitinte tihtur a ni a. Sawrkar thar a lo pian tak vanga thil hi danglam thut turah ngai lo ila, pawisa pawh hi lo pung thur thur tura ngaih tur a ni lo ang. Ruling party memberte hlei hlei hi an fimkhur a tul ang, sawrkarna chan tak avanga kawng hrang hranga hamthatna lo beisei ngawt hi a ‘Kalphung thar’ lova, ramhlui zia an tih fo kha a ni tih an hriat a tul ang. Ram rorelnaa Kohhran pawimawhna kan sawi hian, ram roreltute hi Kohhran in a thuhnuai tur tihna a ni lova. Ram rorel dan tur (Politics) hi bibleah a lang tam em em a, roreltute pawh Kohhran mi tho an nih a vangin dik taka rorelna kalpui tura Kohhran aw hi ngai pawimawh zel teh se.