Kan sawrkar chuan corporator ten dik takin sum an hmang ang – MPCC president
Kan sawrkar chuan corporator
ten dik takin sum an hmang ang
– MPCC president
Aizawl Municipal Corporation-a sawrkarna an siam chuan an corporator-ten dik takin sum an hmang dawn tih Congress hruaitu Lal Thanzara chuan a sawi a. An lo duan tawh Master Plan for Aizawl Vision 2030 chu an tihlawhtling dawn tih a sawi bawk.
AMC inthlan tur inbuatsaihnaa Ward No XVIII leh XIX in joint political training an neih a hmanpuinaah MPCC president Lal Thanzara chuan, AMC-ah an sawrkar a nih chuan, sum hmanna dik takin an corporator-ten an kalpui dawn tih a sawi a. Aizawl khawpui a chep tawh em avangin ‘urban planning’ mumal neih a ngai a, ruahmanna thar neih a ngai tawh hle tih a sawi.
“Congress party-in chakna kan chang a nih chuan, AMC hian a thawh tur dik tak Aizawl khawpui hmel ti danglam dawrh khawpin hmasawnna atan a thawk dawn a. Congress sawrkarin a lo duan tawh – Master Plan for Aizawl Vision 2030 vawiin thlenga bawhzui loh hi kan tihlawhtling dawn,” a ti.
AMC-a Congress candidate ho chu tawnhriat nei tha, local council member an nih bakah kohhrana rawngbawltu tha ber ber an ni, tiin, milar leh mihausa candidate atan an nei ve lem loa, an beisei erawh a sang tih a sawi a ni.
Tunhnai lawkah ZPM-in solid theihna tura an ngaih Zemabawk West-ah local council inthlan buatsaih a ni a. Rulling lamin theihtawp chhuahin sum leh pai an seng niin Lal Thanzara hian a sawi. “Thawm riva ka hriat danah phei chuan LSC pawh tihfel sak turin an lo va intiam niawm tak a ni. Chuti chung chuan Congress candidate tling kan la nei kha Pathian malsawmna leh miten Congress-ah beiseina an nei a ni tih a tichiang hle,” a ti.
Central-a BJP sawrkar chu ZPM-in tlawn chikima an tlawn chung pawhin, Mizoram-in sumah ziaawm lam a pan thei lo tih Congress hruaitu hian a sawi a. Tunhnaiah pawh North East state dangten SASCI-ah vaibelchhe 2000 chuangte an hmuh laiin Mizoram chuan vbch. 100 chiah a hmu a. State budget an pharh takah khan SASCI bika an sum hmuh tura an dah chu vbch. 1000 ni mah se, vbch. 100 chauh Mizoram-in a hmuh tak avangin vbch. 900 laiin a tlahniam duai dawn tih a sawi. Hei hian ZPM sawrkarin eng hna mah an thawh thiam loh zia a tarlang chiang hle niin a sawi a ni.