Kan thalaite thanharh a tul hle

Kan thalaite thanharh a tul hle
– C Lalsawivunga
Kan state-a sawrkar hna sang leh pawimawhah hnamdang an awm a ngai deuh ta zel chuan rilru a kap a, thalaite an thanharh a tul ta hle tih minister C Lalsawivunga chuan a sawi.
Aizawl South-I bialtu MLA ni bawk C Lalsawivunga hian HSSLC Exam 2025 top 10-a tling, a bial chhung amite chu Thawhlehni khan lawmpuina buatsaihin laptop a hlan a. MLA dinhmun a chelh tirh atanga vawiin thlengin Mizo thalaiten All India service/ central service-a luh duhna thinlung an put theihnan theihtawpin a au thin a, hei hi ramin a mamawh lian tak leh kan tlakchham mek a ni, tiin a sawi.
Tunhmaa All India service/ central service-a Mizo thalai lutte state leh central sawrkar indawr tawnnaa leh state chhunga sawrkar hna pawimawh chelh kawngah an thawhhlawk thin hle tih sawiin, “Hun a lo inher zel a, kan mi hmasate an pension zel a, mithar lut kan awm ta meuh si loa, kan state-a sawrkar hna sang leh pawimawh tamtakah hnamdang an awm a ngai ta deuh zel a, hei hian rilru a kap thin hle,” a ti.
Hei vang hian kan thalaite an thanharh a tul ta hle tih a. MPSC mai ni lo UPSC thlenga inziaktling thei tura rilru siam a ngai takzet tawh tih a sawi a ni.
Aizawl South-I atanga HSSLC result chhuaka top 10-a a tlingte – Kristin Laldinpuii Ralte d/o Lalsangliana Ralte, College Veng (1st rank in commerce); Lalmuankimi Sailo d/o Robert Lalthlamuana, Republic Vengthlang (7th rank in science); Juliet VL Hriatzuali d/o R Zonunsanga, Bethlehem Veng (7th rank in commerce)