Aizawl chhimlam chawm tur tui lakna hman theihin hawng

Muallungthuah NESIDS OTRI hnuaia hmalakna ‘Alternate Gravity Water Supply Scheme of Aizawl’ chu Thawhlehni khan PHE minister Prof. Lalnilawma’n a hawng.
PHE minister chuan kum 2018 atanga 2025 thlenga sawrkarna siamtu party pathum leh PHE department thawktute thahnemngaihna leh inpekna avanga project hlawhtlinna an hmu thei chu lawmawm a tih thu a sawi a. Khawl leh kawlphetha rin ngai loa, awi tlan behchhana tui lakkhawl leh sem theih tura ruahmanna chuan inrenchemna kawngah nasa takin hmasawnna a thlen a beisei tih a sawi a ni.
He project hi NESIDS funding-in cheng vaibelchhe 117.3035 senga siam a ni a. A hna hi Kram Infracon Pvt leh Vikas Associates tangdun thawh a ni. Tui litre vaibelchhia 248 dawng ‘Earthen Dam’ tuikhuah, Hualtu ram chhunga Dilzawl hmunah siam a ni a. Tui hi sawngbawl a nih hnu ah Muallungthu tlanga tui dahkhawlna, litre nuai 15 khawl theihnaah chhun luh a ni.
Muallungthu ram Khumtung peng atang hian tui, nitin litre maktaduai (MLD) 3 pechhuak turin, Mel-3 Trinity Hospital bul thleng luang pheiin, helaiah hian lak pen a ni a. Salem Mualpui lamah 2 MLD leh Mission Vengthlang lamah 1 MLD chhun luh tur a ni.