Rev. Dr. Zaichhawna Hlawndo
-- Advertisement --
‘Kan Thlahtu tobul Ka Chhui Chhuah Dan’ tih chhunzawmna kan ziak dawn a. He kan thu ziak hian kan mithiam rualte – Pathian thu zirmi (theologian) leh chanchin chhuitu (historian) pawh a cho chhuah ngei ka beisei. Hnama kan chian loh vang leh hnama chian kan lo in zirtir dan dik loh avanga Zofate inthen darhna te a tawp thuai a ngai. Chumi atan chuan bengsik tak meuh a kan ngaihtuah tlan a, kan thlahtu bul, kan tobul hi mipuite pawhin kan ngaihven a, kan harh a ngai a ni. Kan thlahtu bul ka chhui chhuah dan point hrang hrang kan ziah tawhte chu:-
(1) Chanchin ziaktu (Historian) ten kan pu Zoa bak thlahtu hming hriat an nei lo
(2) Kan thlahtu bul Zoa hming kan lo lam dang hrang hrang awm zia
(3) Kan thlahtu hming Zoa hming chawiiin British mite hming kan lo phuah sak zel dan leh
(4) Kan thlahtu Zoa hming kan put chhunzawm zel dan te kan sawi tawh a, a chhunzawmna kan ziak leh dawn a ni.
5. Bible hmangin kan thlahtu ka chhui:
Kan thlahtu bul chhui nan hian kan mithiam rualte, a bikin Pathian thu thiam (theologian) te hian Bible hmangin kan thlahtu an lo chhui mumal miahlo hi thil mak tak chu a ni. Khawvel lehkhabu awm tawh zingah Bible hi mihring lo pian dan leh inthlahchhawn dan ziahna bu tha ber leh rin tlak ber a ni. Thuthlunghlui bu pawh hi thlahtu bul Adama atanga inthlah chhawn zel dan leh an khawsak dan bu a ni tih mai tur a ni. Thuthlung Hlui hunah chuan thlahtûte chhui kha an dah pawimawh êm êm a. Bible ropuina pawh a hnam thlan Israel fate khan an thlahtute hming leh chanchin engkim kha ziakin an lo dahna bu a nih tlat vang a ni. Thuthlung Thar bu hmasa ber Matthaia bung hmasa ber pawh thlahtu chhuina chanchin a ni. Chuvang chuan Zofate tobul kan chhui dawn chuan Bible kan hman ngei ngei a ngai. Bible atanga kan thlahtu tobul ka chhui chhuah dan te ka rawn ziak dawn a ni.
6. Evi leh Adama thlahte kan ni:
Zofate hi China rama puk atanga lo piang emaw, engtin tin emaw China ram khawilai emaw atanga lo piang chhuak kan ni lo. Bible a mihring hmasa ber Evil eh Adama thlahte kan ni. Bible hi kan chanchin ziahna bu a ni tih pawh hrelovin tute chanchin ziahna emaw kan lo ti thin. Genesis a kan hmuh dan chuan Evi leh Adama te khan fa pathum – Kaina, Abela leh Setha te an nei. Kaina chuan Abela a that a, chuvang chuan thlahtu chhui tur a nei ve lo. Kaina leh Setha kal zel chhuina ah Zofate chu Setha thlah kal zel a mite kha kan ni.
7. Nova thlah kal zêlte kan ni:
Bible a kan hmuh dan chuan Evi leh Adama thlah kal zêl ten Pathian thuthlung an bawhchhiat avangin Nova te chhungkua atangin mihring thar, khawvel thar din a tum a, tuiletah khan a dang zawng chu an thi vek tih a ni. Nova hi Adama fapa Setha thlah chhuan 8 na a ni. Keini pawh hi Nova thlah kal zel kha kan ni a, mahse chulam chu kan chanchin ziaktute leh kan Pathian thu thiam te khan min lo chhuipui loh avangin vawiin thleng hian kan la chiang lo a ni. Nova chuan fapa pathum-Zaphetha, Hama leh
Shema te a nei a. Chung a fapa pathum te zinga mi Shema thlah kal zel Abrahama tu leh fate kan ni.
8. Abrahama thlah kal zelte kan ni:
Nova thlah kal zelte pawh chu Pathian duh dan angin an awm lo. Pathianin Nova fapa Shema fapa hmanga hnam thuthlung hmanga khawvel chhandamna hna thawh a tum ta. Abrahama hnenah Pathianin thutiam fa, mihring nih phung pangngai anga hrin nilo, ama thiltihtheihna hmanga pêk a tiam a. Mahse a nupui Sari thurawn angin a hmei Hagari lak atangin fapa Ismaela a hring. Pathian chuan a thutiam ang ngeiin a nupui pawh a tar hnu, fa pai thei dinhmun pawh a nih tawh loh hnuah fa a pai tir a, Isaka a lo piang ta. Chu thutiam fa Isaka thlah kal zelte kha kan ni. Abrahama hian a nupui Sari thih hnuin a nupui Keturi lakah fapa paruk lai a neih leh thu pawh Bible ah kan hmu.
9. Isaka thlah kal zelte kan ni: Abrahama fapa Isaka chuan a nupui Rebeki lakah phir fapa pahnih Esaua leh Jakoba te a nei a. Pathianin Isaka fapa Jakoba ah hnam thu a thlung chhunzawm zel a. Jakoba chuan a nupui Leaii, Rebeki leh a hmei pahnih Bilhaii leh Zilpaii te lakah fa 12 a nei a, chungte chu (1)Reubena
(2) Simeona
(3) Levia
(4) Juda
(5) Dana
(6) Naphtalia
(7) Gada
(8) Ashera
(9) Issachara
(10) Zebuluna
(11) Zosefa leh
(12) Benjamina.
Jakoba hming hi Israela tiin Pathianin a thlaksak a tih kan hria. Jakoba hian a fapa 12 te zinga a duat leh duhsak ber chu a nupui Rebeki fapa Zosefa a ni. Zosefa chu a duhsak bik avangin puan tial mawi tak a pe a, a u te pawhin an thik hle a nih kha.
10. Zosefa thlah kal zelte kan ni:
Bible-ah kan hmuh angin Zosefa chuan On khaw puithiam Potiphara fanu Asenathi a nei a, chumi lakah chuan fapa pahnih Mannasseh leh Ephraim te a nei. Jakoba (Israela) a lo upat a, a thih dawn hnaihah chuan a fapa 12 te mal a sawm a, chung malsawmna a hlan zingah chuan a fapa te fa (a tute) malsawmna a hlan awm chhun chu kan pu Zosefa fapa pahnih Mannasseh leh Ephraim te an ni. Keini ho hi tudang ni lovin Zosefa fapa pahnih Ephraim leh Mannasseh thlak kal zel Zosefa tu leh fate kan ni tih hi ka chhuichhuah dan chu a ni.