VC/LC member atana ka duhthusamte

K. Hmingthankaia
1. VC/LC hi eizawnna emaw, sum tuakna emaw ti lo leh, mahni tana pawisa siamna tur remchang dap ru tlat reng thin lo tur leh hausakpuina tur a ni lova, intih lar leh intih pawimawhna rur a ni hek lova, tlawmngaih chhuaha Veng nu leh pa nih huama inpekna a ni tih hria.
2. VC/LC hi MLA level a ni lo tih hriaa, VC/LC nihnaa lungawi tak leh thahnemngai taka eng kawngah pawh rintlak leh nun hmang mi. Amaherawhchu, VC/LC hi MLA kailawn a ni thei tih hriaa engkima phur taka hna thawk mi.
3. Mi chi hrang hrang, a te ber atanga a lian ber, rethei ber atanga hausa ber, rui thinte leh Pastor thlenga nel ngam, fiam ngam, engkim zawh ngam leh hauh bawrh bawrh ngam.
4. Zan men rei leh zing thawh hma ngaia nei thei mihring. Mihring khawsak dan leh nun dan leh tawngkama inla high lo, chapo lo chhungkua ami.
5. Englai pawha Electric eng leh eng lo ngaihven reng peih leh, department hnena report zat zata, mipui hnena information pe leh zung zung thei leh peih.
6. Mi Veng leh mi Khaw thenkhatte tih theih ang, Electric eng tha lo inhrilh reng ringawt duh tawk lova, Electric lama Veng bil hmasawnna tur ngaihtuah thiam pha, entir nan, Transformer volt sang zawk neih leh, Transformer dah belh dan leh thil dangahte kawng dap thiam.
7. Vengchhung tui sem kawnga tan lak thiam leh information pe zat zat thin. Tui leak leh mimal tui ti baw nasa lutuk thin report ngam.
8. Vengchhung kawng ngai pawi mawh. Kan Veng bikah chuan, Khuangchera section Lamhnai tuikhur atanga vailui kal tlanga Bethlehema chhuak tur kawng bawhzui dan thiam leh ti hlawhtling tur.
9. A taka Ui khuahkhirh ngam. Ui leh a neitu laka na taka action la ngam. Mahni compaund pel leh, midang tibuai thin ui suat rawt ngam.
10. Faina kawnga tih tak zeta hma la ngam. Tu pawh hau ngam. Kawr bula awmten kawra tawih thei lo paih chingte hau ngam.
11. Pem tharte, refugee-te, foreigner leh hnam dang reng reng helaia nung chang tha zirtir ngam.
12. Zahna nei map lova ruih hmang leh mi hnawksakte leh mi chapote huai taka khak ngam. Kan Veng bikah chuan, Treasury Square vel, abik takin MAHCO step vela khaw en lai renga zu in thinte hnawt darh ngam.
13. Engkima a ngaihna hria, Office hrang hrang leh Officer-te dawr dan hria leh dawr ngam leh dawr dan thiam. Officers leh mi tu pawh, Sawrkar thu neitute nek ngam leh hau ngam.
14. Thil pawimawh deuh mai, Vengchhunga awm nghet ngei kan nihzia hriatpuina, Residential witness hi Vengchhunga awm nghet ngei kan ni tih an hriat chuan, a lehkha-in emaw, form awmsaah emaw an sign mai tur a ni. Stationery man vel atan tlem azawng an lak chu thu hran, kan hmanna tur azira pawisa min chawitir thin hi tih loh tawp tur a ni. An sign chhan kha kan thil tih tur lama an thu neihna ni hauh lovin, an khua leh tui kan ni tih hriatpuina mai a ni. Chu chu an tihtur, LC/VC, Local body awm chhan a ni.
Keinin chu lehkha chu kan duh duhnaah kan hmang ang. Vai permit siam nante, mi bail nante, dawra thil man bat nante, nupui zawn nan leh nupui ruk nan emaw leh, zu man bat nan thleng pawhin kan hmang ang chu. Kan hmanna tur annin min zawh ziah hi a tul lo.
Entir nan- “K. Hmingthankaia hi Venghluia awm, piang leh seilian chu a ni ngei a, mahse, Veng tan tangkaina nei miah lo a ni a. Hmelchhe deuh, hmanah chuan hmuihmul zuah thin a ni a. Engmah thiam nei si lovin, mi rethei zurui chapo ve em em ringawt thin a ni. Chu zawng chu kan hriatpui dan chu a ni mai a. A bak, a hmanna tur lam chu kan hriatpui lo. In thu thu a ni a, in tih tiha in tih atan ka rawn ziahsak a ni e” an tih mai kha a tawk a ni.
15. A tawp berah chuan, engkima rilru hrisel neite hi engkimah an rin tlak a, engkimah innghahna tlak an ni e.
Chutiang mi chu kan Veng, kan Khua theuhin kan neih theih nan i vote hlu tak hmang khan, fimkhur takin vote i thlak theuh ang u aw.