Kangmei laka himna atan fimkhur turin mipui chah

Kangmei laka himna atan
fimkhur turin mipui chah
Khua a thal tan a, kangmei laka himna turin Aizawl district bawrhsap chuan mipui hriat atan leh zawm tul a tichhuak.
Veng/ khaw tina Local/ Village Level Disaster Management Committee bakah vengchhung NGO leh kohhran tinin mahni veng/khua theuhah kangmei laka mipui kan him zawknan a tul anga hma la a, zirtirna a tam thei ang bera inpe turin a ngen tih a sawi.
Electric wiring uluk taka siam a, MCB hmang theuh turin a ti a. Gas hmanga eirawngbawl leh thing tuah thuk hmangten thuk hman zawhah uluk taka timit turin a ti. Ram kalten ram kalnaa an meituah/ chhem tha taka ti mit tur leh, ar leh vawk vulhten an ran vulhna atanga kangmei tichhuak thei thuk leh electric hruizam uluk zawk thlithlai reng turin a ti.
Mi tupawhin zialzuk bung timit tha loa khawi hmunah mah paih loa, kang mai thei thil – petrol/ diesel/ gas/ khawnvartui zuarten kang thelhna hmanrua (fire extinguisher/ sand bucket) inchhawp ngei turin a ti. Halmawi leh halpuah, kangmei thlen thei thil sawrkarin hman a khap angin, mitinin he thupek hi zawm theuh turin a ti bawk.
Hei bakah hian kangmei a chhuaha tanpuitu kan kohin chhiatna thlenna hmun chiang taka hrilh thin turin a ti.