Kangmei … Thapui Thawh…

Kumin Kangmei Ven Hapta (Fire Prevention Week) thupui atan ‘Thapui thawhin kangmei chhuak tur i veng ang u’ tih thlan a ni a. Kangmei Ven Hapta hawngtu chief minister pawhin fimkhur loh vang leh suahsual vanga ram tikangte chu an chungah dan anga hma la ngei turin dan kengkawhtute a chah nghe nghe.
Kan hriat angin, a kum tela ramngaw kan neih zat a tlakhniam zel chhan ber pakhat chu tlangram lo neih vang leh, lo hal laia ram dang a kan thin vang te, fimkhur lo leh, suahsual vang hrim hrima ram lo tikang thinte vang a ni ber a. Heng zingah hian a thawh hlawk ber chu tlangram lo neih hi a ni.
Tun tuma kangmei ven hapta thupuiin a kawh ber pawh, lo hal laia a chhehvel ram tha lai a kan kai lohna tura thapui thawh a nih a rinawm a; lo halna kangmei kha pawn lamah a lo chhuak ta thin a, chu chu ‘kangmei chhuak’ tia sawi pawh a ni awm e.
Tlangram lo tur ramngaw kan han vat thlu duai duai a, kan han pho ro (chap) leh te te a, kan hal kang ta dur dur thin a, chu chu ‘kangmei’ a ni a. Kangmei hian a kan tur dik tak a kan chuan ‘a kang tha’ kan ti mai a; lo atana hman tur piah lam ram a kan tel hian kangmei kha a ‘chhuak’ kan ti a, chu chuan pawi a thlen ta bikin kan ngai a ni ber.
A nihna takah chuan tlangram loneihna atana ramngaw kan thiat duai duai thin hi ‘thapui thawha ven ngai’ ber zawka chu a ni. Hetianga hal kan dur dur ngai chunga eizawnna hian ramngaw a tlakhniamtir nasa em em a, suahsual vang leh fimkhur loh vanga ram kang thin hi a huatthlala em em a, hei hi thapui thawha ven pawh tihmakmawh a ni tho.
Mizoram hi India ramah a ram zau zawng nena khaikhina forest area nei zau ber kan nih mek laiin, tlangram lo neih leh ramngaw kan nasat avanga ramngaw chereu chakna ber kan ni leh lawi si hi ngun taka ngaihtuah a, tlangram loneih bansan zawnga ‘Thapui Thawh’ pawh hi kan tihmakmawh tur niin a lang.