Taylor Swift chu Billboard Artist 100 chart-ah a No.1 a, he chart-ah kar 69 a No.1-na ni tawhin, Artist 100 chart-a No.1 ni ngun ber a nihna a sawh nghet leh ta sauh a, hetihrual hian Niall Horan leh Noah Kahan te pawh top 10-ah an lang.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga US-a an album leh hla hralh tam dan te, streaming leh radio airplay te chu tehna pawimawh a ni.
Taylor Swift hian a album ‘Midnights’ leh a album dang pariat a hralh that bakah, a hla Hot 100m chart-ah lang pha a nei nual bawk a, hengte avang hian chart No.2 atangin No.1 a kai thar leh ta a ni. Swift album ‘Midnights’ chu Billboard 200 (albums) chart-ah No.4 a la ni a, a album dang Lover chu No.10 niin, Folklore (15), ‘1989’ (20), Reputation (24), Red (Taylor’s Version) (42) leh Speak Now (43) te Billboard 200 chart-ah an lang.
A hla ‘Karma’ featuring Ice Spice pawh Billboard Hot 100-ah No.9 a ni a, Hot 100 chart-a kar riat No.1 thei, a hla dang ‘Anti-Hero’ pawh No.12 a la ni a, ‘Cruel Summer’ chu No.39 niin, ‘Hits Different’ chu No.84 a ni bawk.
Cruel Summer hi a ‘Lover’ album ami kha niin, an tlangzarh atanga kum li hnuah official single angin an puang thar a, tihian 2019-a a album ‘Lover’ atang hian single panga a nei ta a, Swift hian Hot 100 chart top 40-a lang thei hla 107 a nei tling ta bawk a, hmeichhe zaithiamah chuan he chart-a top 40-a lang thei hla ngah ber niin, mipaah pawh top 40-a lang thei hla 174 nei, Drake chiah a pha lo.
Niall Horan pawh chart No.3-ah a rawn lang thar ve leh a, a solo LP ‘The Show’ chu Billboard 200 chart No.2-ah a debut a, he chart-a a album top five kai thei pathumna niin, One Direction angin top five kai thei album panga an nei tawh bawk a, chung zingah pali chu No.1 a kai nghe nghe a ni.
Noah Kahan chu chart No.6-ah a debut a, ani pawhin a studio album pathumna ‘Stick Season’ hralh that zar a zo a, he album version tharah hian hla thar paruk dah telin, a hlaa hla tihchhuah tawh pakhat chu a extended version a dah tel bawk a, hei vang hian hralh a kal thar leh a, Billboard 200 chart-ah No.100 atangin No.3-ah a invawrh ta a ni. He album-a a hla ‘Dial Drunk’ chu Billboard Hot 100-ah No.43 a kai a, Hot 100 Top 50-a a lan vawi khatna a ni bawk
Kar khat chhunga zaithiam lar ber Taylor Swift
Get real time updates directly on you device, subscribe now.