Kar tawp football hnuhma

Kar tawp khan European top 5 league khelh chhunzawm a ni a, kar tawpah football a thil thleng langsar zual kan tarlang leh ang.
English Premier League
Pathianni zanah Liverpool in 3-0 a Brentford an hneh tumin Mohamed Salah chuan goal hnih a thun. Salah hian English club tan goal 200 a thun tling ta chiah a, goal 200 hi Liverpool tan goal 198 leh Chelsea tan goal 2 a ni. Aigupta tlangval Salah hian EPL 2023-24 season a an home game vawi rukah goal a thun vek a, Liverpool player zingah hetiang ti thei awmchhun niin, club record thar a siam.

Liverpool forward Darwin Nunez chuan assist vawi sarih a nei tawh a, assist a neih zawng zawng hi Mohamed Salah tan vek a ni tlat pek. Tlarhmaa an kawppui tan bik assist vawi sarih nei tling pathumna a ni.

Pathianni zana inkhel hmuhnawm takah Chelsea leh an mikhual Manchester City te chu 4-4 in an ihnehtawk. Chelsea nen 4-4 a an inhnehtawk hi Pep Guardiola-a’n club a kaihruai tawh zawng zawng game 882-ah team hnihin khelh khata goal li ve ve an thun hmasak ber tum a ni.

Chelsea nen 4-4 a an inhnehtawk tum hian City forward Erling Haaland chuan goal hnih a thun. Haaland hian Borussia Dortmund atanga City a zawm hnuin EPL gama khata goal hnih chin thunna vawi 36 a nei tling ta a, hetiang reng renga chetha hi European top 5 league-ah an awm lo.

Inrinni zanah 3-1 Burnley an hneh tumin Arsenal tan Bukayo Saka chuan goal thun lo mah se assist a nei a, Saka hi Premier Leageu-ah kum 23 tlin hmaa goal 30 thun tling a, assist vawi 30 nei tling bawk palina a ni a. Saka hian Wayne Rooney, Cesc Fabregas leh Ryan Giggs te hnung a zui.

Arsenal in Burnley an hneh tum hian Gunners forward Leandro Trossard chuan hmahruaina goal a thun. Trossard goal thun hi Arsenal in an mual Emirates Stadium-ah inkhel hrang hrang an hmachhawn atanga goal 1,000 an thun tlinna chiah a ni.

Inrinni zan khan Wolves chuan an mikhual Tottenham chu minute 90 hnu lamah an goal hnih thun hmangin an hneh nawlh a, minute 90 thleng chak lo mek, minute 90 hnu lamah chak thei epl team pariatna an ni.

Spanish LaLiga
Inrinni zanah Real Madrid in 5-1 Valencia an hneh tumin Real Madrid player Rodrygo chuan goal hnih a thun bakah assist vawi hnih a nei bawk a, La Liga season kal mekah hetiang ti thei awmchhun a ni.

Pathianni zanah Atletico Madrid in 3 – 1 a Villarreal an hneh tumin Atletico Madrid forward Antoine Griezmann chuan goal khat a thun. Griezmann hian Atletico Madrid tan goal 169 thun tling tawhin, an club tana goal thun hnem ber dawttu niiin, Adrian Escudero goal thun nen a inzat mek. Atletico Madrid tana goal thun hnem ber chu goal 173 thuntu Luis Aragones a ni a. Griezmann hian record thar siam theihna hun tha a nei.

Italian Serie A
Pathianni zan khan Inter Milan in si hnih faia Frosinone an hneh tumin defender Federico Dimarco chuan goal a thun. Dimarco hi Europe big-five league hnuhhnung paliah defender zinga goal hnih chung lam thun a, assist vawihnih chin nei tling thei pahnih zingah pakhat a ni a; pakhat zawk chu PSG defender Achraf Hakimi a ni.
German Bundesliga
Bayern Munich forward thar Harry Kane chuan goal a thun tluang zel a, Bundesliga a khelh hmasak 11-ah goal 17 thunin Kane hian Bun-desliga record thar a siam. Bundesliga khelh hmasak 11 atanga goal thun hnem ber ni thin chu goal 16 thuntu Robert Lewan-dowski (2019-20 season) record chu Kane hian goal khatin a khum ta a ni.

Bayer Leverkusen player Florian Wirtz chuan kum 2023 chhunga inelna hrang hrang a hmachhawn atangin assist vawi 18 zet a nei tling a, Bundesliga player zingah hemi chhunga assist ngah ber a ni a, amah hnaih bertu in assist a neih zat hi vawi 12 chiah a ni.

Xabi Alonso hnuaia khel tha tak Bayer Leverkusen chuan League game 11 a tangin point 31 zet a hmu tling ta a. Bundesliga game hmasa 11-a point hmu tam record, Bayern Munich in kum 2015-16 season-a an lo siam tawh chu Leverkusen hian an nihrual.

French Ligue 1
PSG forwawrd Kylian Mbappe chuan Inrinni zana Reims an hmachhawn tumin hattrick a siam a. Mbappe hian Ligue 1-ah hattrick a siam vawi riatna chiah a ni.

Messi-Ronaldo
Cristiano Ronaldo chuan Al-Nassr in 3-1 a Al-Wehda an hneh tumin goal a thun a, Ronaldo hian kum 2023 chhunga inelna hrang hrangah club leh ram tan goal 45 a thun tling ta chiah. Ronaldo hian kum khatah goal 45 a thun tlin vawi 11-na a ni a, kum 2021 hnu lamah a vawi khatna a ni thung. Ronaldo hian kum 2021 khan Juventus leh Portugal tana a goal thun zawng zawng chu goal 47 lai a ni.
Ronaldo-a’n goal a thun zel laiin Lionel Messi erawh chu inelna hmachhawn lovin a hahdam mek a. A vawi riatnana Ballon d’Or a dawn lawmin hun hlimawm a hmang mek a, Messi hnuhma thar tarlan tur a awm rih lo.