Kar tawp football hnuhma langsar

Christmas leh kum thar lawmna vuakvet-ah kar tawp football hnuhma langsar kan tarlang lo vang vang a, ngaihnawm ti tak lo chhiar thinte khua a har hman hle a ni awm e! Pathian hruaina zarah kum thar kan thleng a, tualchhung league hrang hrang khelh chhunzawm ze a ni bawk a. Kar tawp football-a hnuhma thar langsar zual kan rawn chhawpchhuak leh ta e.
English Premier League : Pathianni zana inkhel hmuhnawm zet maiah 2-2 in Liverpool leh Manchester United te an inhnehtawk. He inkhelah hian Liverpool forward Mohamed Salah chuan goal khat a thun. Salah hian season kal mekah vawi 19 khel tawhin goal 31-ah a inrawlh tling tawh a. (18G, 13A) Liverpool player awm tawh zawng zawng zingah EPL game 19 atanga goal a inrawlh tam ber a ni thar a, Match 19 atanga goal 30 a inrawlh tling tawh (23G, 7A) Luis Suarez record a khum. Salah hi season kal mekah a chetha viau a, EPL-ah game 12 chhung assist/goal thun a nei zawn tawh.
Aigupta tlangval Salah hian EPL-ah goal 175 a thun tling ta chiah a, EPL a goal thun tam lamah pangana niin Thiery Henry goal thun zat a tluk ta chiah. Kum 30 mi hian EPL-ah penalty atangin goal 30 a thun tling tawh bawk a. EPL-ah penalty atanga goal thun hnem pangana niin a chungah hian Alan Shearer (56), Frank Lampard (42), Steven Gerrard (32) leh Harry Kane (32) te an awm mek.
English club ropui Manchester United hian an hmelma lian ber Anfield-a harsatna an tawk reng thin a, Anfield-ah hian kum 6 leh ni 20 chhung zet goal an thun thei lo. Pathianni zan khan defender Lisandro Martinez chuan hmahruaina goal a thun a. Anfield-ah minute 558 zet goal an thun theih loh hnuin goal an thun ve leh ta nge nge.
Liverpool lakah hian kum 22 mi Amad Diallo chuan United goal hnihna a thun a. Amad hi Jacob Ramsey (May 2023) hnu lamah Anfield-a EPL goal thun thei naupang ber a ni. Amad hi season kal mekah a chetha chho viau a, inelna hrang hrangah goal ruk a thun tawh. Hei hi Sunder tan 2022-23 season a kal 14 a thun hnua goal a thun tam leh ber tum a ni.
Etihad Stadium-ah goal a thun theih loh vang vang hnuin Erling Haaland chuan inrinni zan khan West Ham United lakah goal a thun ve leh ta. Haaland hian City a zawm hnuin EPL-ah Hammers hi vawi ruk a hmachhawn tawh a, goal 9 a thun tling der tawh a, Hammers hi a ngam hle. West Ham hi City lakah vawi 18 zet an tlawm zawn ta a. EPL-ah bik club khat laka an tlawm zawn rei ber tum a ni hial nghe nghe.
Arsenal rawl thar Ethan Nwaneri a chetha chho viau a, inelna hrang hrangah goal nga a thun tling der tawh. Kum 17 hnuai lamah zingah Europe tualchhung league lian zuala khel zingah goal thun tam ber dawttu a ni mek a, a chungah hian Barcelona tan goal 6 thun tawh Lamine Yamal a awm mek.
Chelsea tan kum 22 mi Cole Palmer a che ropui thei hle a, EPL-a goal 35 a thun tling der tawh. Palmer hi kum 22 hnuai lam zingah Chelsea tana goal thun hnem ber a ni a. EPL khel tawh zawng zawngah kum 23 tlin hmaa goal thun tam pathumna a ni bawk a, a chungah hian Robbie Fowler (92) leh Michael Owen (91) te an awm.
Raúl Jiménez chuan EPL-ah goal 55 a thun tling ta a, Mexican zingah EPL a goal thun hnem ber ni thin Javier Hernández (53) record a khum fel ta chiah.
Spanish La Liga
Champion lai Real Madrid chuan zirtawp zan khan Valencia chu 2-1 in an hnehthal a, hnehna hlu tak an chang. Valencia an hmachhawn tum hian hnufual zawk an ni reng a, si an phurh laiin an player pawimawh Vinícius Júnior hnawhchhuah a ni bawk. Minute 85 hnu lamah si phurh chung leh tlem zawk ni chungin hnehna an chang let tlat thung a. Hei hi La Liga-ah season 15 chhunga a thlen vawi khatna a ni.
Valencia an hmachhawn tum hian kum 39 leh ni 116 a upa Luka Modric chuan an si phurh sutna goal a thun. Modric hian Marid tana goal thun thei upa ber Ferenc Puskás record siam a khum a, club record thar a siam.
Barcelona forward Robert Lewandowski chuan season kal meka inelna hrang hrang vawi 25 a khelh atangin goal 25 a thun tling der tawh. Lewandoski hian season liam ta khan inelna hrang hrangah match 49 atangin goal 26 a thun a. Season 14 chhung zet chu a zawnin inelna hrang hrangah goal 25 chin chunglam a thun zawn ta chiah bawk.
Italian Serie A
Inrinni zan khan Napoli chuan Mimuala an khingpui Fiorentina chu 3-0 ngawtin an hneh. Artemio Franchi-ah 3-0 ngawta an chak hi kum 2012 hnu lamah Mimuala an chak chian leh ber tum a ni.
French Super Cup
PSG chu season hnuhnung vawi 12-ah a vawi 11 nan Trophée des Champion an ni leh ta, PSG hian Trophée des Champions-a champion ngun ber an nihna an tizau leh zual.