Feli Fanai ICU-ah enkawl mek a ni

Feli Fanai ICU-ah enkawl mek a ni
Mizo hmeichhe zaithiam hriathlawh berte zinga mi Feli Fanai chu thin (liver) tha lo avangin Ebenezer Hospital ICU-ah enkawl mek a ni a, a dinhmun a tha lutuk lo ni a a lan rualin nimin lamah hmasawnna tlem tlem hmuh tur a awm niin a buaipuitu a thiantha ten an sawi.
Feli hi thian lam fel lo avanga lo inenkawl reng tawh a ni a, kum hmasa lamah pawh he natna avang hian damdawi in a lut fo tawh a, nikum Krismas bawr vel khan a nuam lo zual leh deuh a, Aizawl Hospital-ah enkawl a ni a, mahse, beisei angin hma a sawn chak thei lova, a thiantha te inrawn khawmin Aizawl Hospital atangin Thawhtanni zan khan Ebenezer Hospital ICU-ah an luh pui ve leh ta a ni.
Feli hi a pum a puar a, a taksa pawh a eng (yellow) niin a thiante chuan an sawi a, mahse, nimin, Thawhlehni kha chuan thil te pawh a ei ve leh thei niin an sawi a, “Nimin kha chuan hmasawnna a awm niin kan hria a, a lawmawm khawp mai. Chutih rualin a dinhmun hi tlang taka sawi chuan a tha lutuk lo niin a ngaih theih a, mahse, beisei tur awm lo ang em chu niin kan ngai lo,” an ti.
Feli hi a natna avang hian kum hmasa lamah te a lo inenkawl nual tawh a, a eizawnna ber zai pawh a tih hleihtheih tak loh avangin a thiantha ten a mamawh leh inenkawlna senso te eng emaw chen tumpui theih beiseiin, Feli damlo kanna pe duh, damdawi in lama kal thei lo ten damlo kanna an pek theih nan GPay a damlo kanna pek theihna tur an buatsaih a, 9862169305-ah (Print Mart… Linda Lalremmawii) hian damlo kanna pek theih a ni e. Hetihrual hian Feli buaipuitu a thiante chuan, “Feli fanai damloh chungchangah vehbur khawn sak ang deuh a thuthang awm hi pawi kan ti hle a,vehbur khawn sak ni loin, kan duh leh tanpui duh tam tak an awm si a, heng te tana awlsam zawk nan Gpay theihna kha siam mai a ni a. |henkhatin a ni lo lam deuh a an sawi hi pawi kan ti hle a ni. Kan duh kan hman lo, amah duhsak si te tana remchang siamna mai zawk a ni e,” an ti bawk.