Kar tawp football hnuhma langsar

Kar tawp khan Europe a tualchhung league lian zual khelh chhunzawm a ni a. FA Cup semi-final khelh a nih laiin Spanish Copa del Rey final khelh a ni bawk. Inkhel hmuhnawm tak takah hnuhma thar hmuh tur a awm leh nual a, kar tawp football a hnuhma langsar zual kan hrut kual leh ang.
English Premier League
Pathianni zan khan Liverpool chuan Anfield-a an mikhual Tottenham chu 5-1 ngawtin an sawp a, EPL champion thar an ni. Liverpool hi English top-flight-ah vawi 20 an champion na a ni a, champion ngun ber Manchester United record an nihrual. English First Division title la hnem zualte chu Liverpool & Manchester United – 20, Arsenal – 13, Manchester City -10 leh Everton – 9 te an ni. Champion thar Liverpool hi kum 2017-18 hnu lamah EPL-a champion chiang hmasa ber an ni.
Liverpool hi an manager thar Arne Slot-a’n a season khatnaah a champion pui nghal a. EPL manager zingah season khatnaa an team enkawl champion pui nghal thei parukna a ni a. Antonio Conte, Claudio Ranieri, Manuel Pellegrini, Carlo Ancelotti leh José Mourinho te hnung a zui. Manager zingah EPL-a team champion pui hma palina a ni a, a hmaah hian Ranieri, Conte leh Ancelotti te an awm a. Slot hi Dutch manager zingah EPL a champion hmasa ber a ni.
EPL-ah Liverpool an champion tak vangin Arsenal chu pahnihna an ni leh ngei dawn niin a lang a. Pahnihna ni chunga season an khar leh a nih chuan EPL-ah a zawnin vawi thum pahnihna an nih zawnna tur a ni.
Liverpool tan hian Mohamed Salah chuan Tottenham lakah chakna goal a thun. Salah hian season kal mekah goal 28 thunin assist vawi 18 a nei a, goal contribution vawi 46 zet a nei tawh a, EPL season khata goal contribution nei ngah ber ni thin Andy Cole leh Alan Shearer te record a nih rual. Salah hian EPL-ah goal 185 a thun tling tawh a, EPL-a goal thun tam lamah pangana a i a, Sergio Agüero record a lehpel.
EPL atang hian Southampton, Leicester City leh Ipswich Town te an tlahniam chiang tawh a, game khelh hmabak pali la awm chunga tlahniam tur a chian vawi khatna a ni.
FA Cup
Pathianni zan khan Manchester City chuan an khingpui Nottingham Forrest chu 2-0 in an hneh a, final an lut. City tan hian Rico Lewis chuan inkhel tan atanga minute 1:49-na lekah hmahruaina goal a thun. Lewis hi season 10 zet hnuah FA Cup semi-final a hmahruaina goal thun rang ber a ni.
Manchester City hi FA Cup-ah a zawnin vawi thum final an luhna a ni a, Chelsea (2020-22) hnu lamah a zawna FA Cup final vawi thum lut zawn leh thei hmasa ber an ni.
City hian final-ah Crystal Palace an hmachhawn leh dawn a, Palace nen an inkhel hnuhnung vawi 7-ah City hian tlawm an nei lova, vawi li chakin vawi thum dang an inhnehtawk. Palace hian FA Cup bikah City an ngam lo viau a, City laka an chak hnuhnung ber tum chu kum 100 liam ta, 1921-ah daih tawh khan a ni. Crystal Palace FA Cup final an luh vawi thumna an ni a, final an luh tawhah an la chak ngai miah lo.
Copa del Rey
Inrinni zan khan Spanish Copa del Rey final khelh a ni a, inkhel hmuhnawm takah FC Barcelona chuan an hmelma lian Real Madrid chu 3-2 in an hneh a, Copa del Rey-ah a vawi 32 nan an champion. Barcelona chakna goal hi minute 116-naah Jules Kounde thun a ni. Kounde hian inelna hrang hrangah Real Madrid vawi 15 a hmachhawnna a ni a, Real laka goal a thun vawi khatna a ni.
Season kal mekah Barcelona hian Real Madrid an ngam viau a, vawi thum an hneh zawn tawh. Hei hi 2011-12 hnu lamah El Clasico-ah vawi thum an chak zawn lehna hmasa ber a ni.
Barcelona laka an tlawm tum hian Kylian Mbappe chuan freekick atangin goal a thun. Mbappe hian a club thar Real Madrid tan inelna hrang hrangah goal 34 a thun tling tawh a, Real Madrid tan season khatnaa goal thun hnem lamah Cristiano Ronaldo record a thaichhia a. Mbappe chungah hian Real Madrid ta season khatnaah goal 37 thun Zamorano a la awm.
Spanish La Liga
Atletico Madrid tan Julian Alvarez a chetha chhunzawm zel a, a club thar tan hian inelna hrang hrangah goal 22 a thun tling der tawh. Alvarez hi Antoine Griezmann (2015-16) hnu lamah Atletico Madrid tan season khata goal 15 chin thun thei naupang ber a ni.
La Liga atang hian Real Valladolid an tlahniam chiang tawh a, tun hi La Liga atanga vawi 10 a tlakhniamna a ni.
German Bundesliga
Season kal mekah Bayern Munich in clean-sheet vawi 14 an nei tawh a, season kal mekah an ni aia clean-sheet nei tam awm chhun chu clean sheet vawi 15 ve ve nei mek Napoli leh Juventus te an ni.
Bayern Munich player ropui Thomas Muller chuan Bundeliga-ah vawi 500 a khel tling chiah a, Bundesliga-ah club khat tan game 500 khel tling thei palina a ni a, Charly Körbel (602 for Frankfurt), Manfred Kaltz (581 for Hamburg) leh Michael Lameck (518 for Bochum) te hnung a zui..