Kar tawp football hnuhma langsar
Kar tawp khan Europe-a tualchhung league lian zualte khelh chhunzawm a ni a, Arsenal an chak laiin Liverpool leh Manchester City te an chak lo ringawt. Season thara El-Clasico hmasaber; boruak sang takah Real Madrid in Barcelona an hneh bawk. Kar tawp football a hnuhma thar langsar zual kan tarlang leh ang.
English Premier League
Inrinni zan khan champion lai Liverpool chu Brentford hneh lovin an tlawm. Liverpool hi EPL-ah vawi li an tlawm zawnna chiah a ni a, EPL champion lai zingah vawi li tlawm zawn palina an ni. A chhe zawnga mi record an khum rual hian EPL-a an tlawm rei ber record chhe lam an siam tel bawk.
Stamford Bridge-a an mikhual Sunderland laka an tlawm tumin Alejandro Garnacho chuan minute lina lekah Chelsea hmahruaina goal a thun. Garnacho hi Argentina player zingah Chelsea tana goal thun thei pangana a ni a, Juan Sebastián Verón, Hernán Crespo, Gonzalo Higuaín leh Enzo Fernández te hnung a zui.
Pathianni zan khan Arsenal chuan 1-0 in an mikhual Crystal Palace an hneh. Gunners hian season kal mekah clean sheet vawi ruk an nei a, Europe’s top 5 league-a clean sheet ngah ber an ni mek.
Pathianni zan khan team lian Manchester City chu Aston Villa lakah an tlawm ringawt. City hi Villa mualah an tlawm vawi sarihna a ni a, EPL club zingah Mimuala an ngam loh zual pali zingah Villa hi an tel a. Villa aia an ngam loh tam chu Liverpool, Manchester United leh Tottenham Hotspur te an ni.
Villa lakah an tlawm vangin season kal mekah khelh 12 chhung zet goal thun zawn a, goal 22 zet thun tawh Erling Haaland kal tluang lai chu tihtawp a ni ta.
Brentford laka an tlawm tumin Mohamed Salah chuan goal khat a thun. Salah hian EPL-ah goal 189 a thun tling ta chiah a, EPL-ah goal thun tam lamah palina niin a chungah hian Alan Shearer, Harry Kane leh Wayne Rooney te an awm mek.
Spanish La Liga
Pathianni zana El-Clasico-ah Real Madrid an hneh loh tumin Barcelona midfielder Pedri chuan red card a hmu. Pedri hian senior team-ah vawi 204 zet a khelh hnuin red card a hmuhna hmasa ber a ni.
Xabi Alonso chuan manager ni chunga El-Clasico a hmachhawn hmasak berah hnehna an chanpui nghal a, Miguel Muñoz (1960) hnu lamah Spanish manager zingah El-Clasico hmachhawn hmasak ber tuma hnehna chang nghal thei hmasa ber a ni.
Real Madrid hian season liam ta khan an elpui lian ber Barcelona an ngam lo viau a, El-Clasico-ah vawi li ngawt an tlawm zawn. Vawi li an tlawm zawn hnuin an chak ve leh nawlh. Barceloona laka an chakna goal hi Jude Bellingham thun a ni a, Bellingham hian April 2024 hnu lamah a vawi khat nan El-Clasico-ah goal a thun ve ta nawlh bawk.
Real Madrid hi an mualah a zawnin vawi 11 an chak tling ta a, 2013-14 chhunga vawi 17 zet an chak zawn hnua an chak zawn rei leh ber tum a ni. Real tan hian Kylian Mbappe chuan game 11 chhung zet goal a thun zawn tawh a, season kal mekah goal 22 a thun tling der tawh.
German Bundesliga
Champion lai Bayern Munich chu inelna hrang hrangah vawi 13 an chak zawn ta chiah a, kum 1992-93-ah season thara vawi 13 zet chak zawn a, chak zawn rei record siamtu AC Milan
Inrinni zanah 3-0 a Borussia Mönchengladbach an hneh tumin Bayern tan hian kum 17 leh ni 246 a upa Lennart Karl chuan goal a thun. Karl hi Bayern tan Bundesliga-a goal thun zinga naupang zual pathumna a ni a, a chungah Mathys Tel leh Jamal Musiala te an awm.
Bayern Munich hian Bundesliga match 8 atangin goal 30 ngawt an thun a, hetiang zat game-ah Bundesliga-a goal thun hnem ber an ni.
Italian Serie A
Napoli midfielder Scott McTominay chuan Italian Serie A-ah goal 14 a thun tling ta a, Scottish zingah zingah Serie A-a goal thun tam record a nih rual.
Hakan Calhanoglu chuan penalty a pet goal thei zui zel a, Inter Milan tan penalty vawi 27 a pet tawh atangin vawi khat chiah a la thelh.