Hot 100-ah Taylor Swift ‘The Fate of Ophelia’ a la No.1

On Oct 29, 2025 7 0

Hot 100-ah Taylor Swift ‘The Fate of Ophelia’ a la No.1
Taylor Swift hla hit ‘The Fate of Ophelia’ chu Billboard Hot 100 (US singles) chart-ah a No.1 a, he chart-ah hian kar thum a No.1-na a ni ta. Hetihrual hian Swift hian record a siam a, a album ‘The Life of a Showgirl’ chu tunkar Billboard 200 (albums) chart-ah No.1 bawkin, hetianga Billboard 200 leh Hot 100-a a ruala No.1 ve ve hi tum 17 a neihna niin, chart record a siam a, Billboard 200 leh Hot 100-ah hian a rualin kar thum a No.1 ve ve tawh a, hei pawh hi heng chart pahniha a ruala No.1 ni zawn rei ber record a ni bawk.
Tunkar chart-ah hian a vawi khat nana chart top 10-a lang thar pahnih an awm a, Olivia Dean ‘Man I Need’ leh Leon Thomas ‘Mutt’ te chu top 10-ah an lang thar ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
The Fate of Ophelia hian stream maktaduai 33.6 leh radio airplay ngaithlatu maktaduai 49.4 a la nei thei a, sales pawh 6,000 a la tling a, hei hi a kar thum nan chart-ah a No.1 pui leh ta a ni.
Tunkar chart top 10-ah hian Taylor Swift hla pali a la lang thei a, a album tlangzarh hlimah top 10-ah a hla hlang langin, a kar hnihnaah top 10-ah hla pariat neiin, tunah, a kar thumnaah top 10-ah hla pali a la nei thei a ni.
Kar kalta chart a hla No.2 ni thei ‘Opalite’ chu No.4-ah a tawlh ta a, ‘Elizabeth Taylor’ chu No.5-ah bawk la awmin, ‘Father Figure’ pawh No.6-ah bawk a la awm.
Taylor Swift hian tum khata Hot 100 chart top 10-a hla pali chin nei ngun ber record siamin, tum sarih hetiang hi a nei taw a, a dawttu chu Drake niin, tum ruk a nei tawh a, Kendrick Lamar leh The Beatles ten tum nga ve ve an nei tawh bawk.
Chart No.1 hlui KPop Demon Hunters soundtrack HUNTRIX “Golden” chu No.3 atangin No.2 a kai thar leh ta a, chart No.1 hlui bawk Alex Warren ‘Ordinary’ pawh No.4 atangin No.3 a kai leh ta bawk.
Top 10 atanga chhuak tawh, chart No.2 pawh lo ni tawh, Justin Bieber ‘Daisies’ chu No.15 atangin No.7-ah a invawrh thar leh ta a, top 10 atanga chhuak tawh tho, Morgan Wallen ‘I Got Better’ chu No.16 atangin No.9 a kai thar ve leh ta bawk.
Olivia Dean ‘Man I Need’ chu stream maktaduai 14.3 leh radio airplay ngaithlatu maktaduai 17 neiin, No.17 atangin No.8-ah a invawrh a, chart top 10-a a hla lang thei hmasa ber a ni. Hetiang bawk hian Leon Thomas ‘Mutt’ pawhin stream maktaduai 7 leh radio airplay ngaithlatu maktaduai 59.7 neiin, No.18 atangin No.10-ah a invawrh a, chart top 10-a a lan vawi khatna tho a ni.