Karlehah Modi-a’n US tlawh dawn

Indian Prime Minister Narendra Modi chuan karlehah hian US a tlawh dawn a, President Donald Trump nen an inkawm dawn tih White House-in a puang.
Modi-a hi ni hnih a cham chhungin US president hian zanriah a buatsaihsak dawn nia sawi a ni bawk a. A zin ni tak tur erawh puan a la ni lo.
Modi-a hi Trump-an a vawi hnih nana White House a luah leh hnua ram hruaitu tlawhtu hmasa zinga mi a ni dawn a. Israeli Prime Minister Benjamin Netanyahu chu Washington-ah cham mekin Japan Prime Minister Shigeru Ishiba-a’n tun karah a tlawh bawk ang.
Modi leh Trump-a hi US president a nih hmasak lai khan an inpawh hle a. Kar hmasa khan phone-a inbiain dan lova pem te, venhimna leh sumdawnnaa inkungkaihna thil te an sawi dun tih White House chuan a lo sawi tawh.
Mi thiamte chuan hruaitu pahnih inkawm tur hi ngaihven hlawh tur a nih thu sawiin sumdawnna leh pem chungchangah thutlukna lian an siam an ring.
Trump-a hian nikum khan Modi-a hi ‘hruaitu ropui’ tiin a lo sawi tawh a, hetih rual hian India chu bungraw lak luh man tisang uchuak niin a sawi tho bawk.
Indian hruaituin Washington a tlawh tur thu hi US sipai thlawhnain an lova an rama Indian awm 100 chuang phur hawa Punjab-a a tumpui hnu lawka puan chian a ni.
Heng mite hi an zavaiin dan lova US lut leh an awm theih chin tur aia tam awm zui an ni hlawm.
Kar hmasaa an inbiaknaah khan Trump-a hian India chuan dan lova pem chungchangah ‘thil dik tak a ti ang’ tih a rin thu a lo sawi tawh.
An rama dan lova lut leh awmte thawh chhuah chu a campaign lai atanga an auhla pui ber pakhat a ni a. A hma khan Bloomberg chuan lehkha kimchang nei lo Indian 18,000 vel US-ah hian an chen thu leh an zavaia finfiah an ni tawh tih a tar lang a, a tak taka an zat erawh hei aia a tam rin erawh a ni.
Pew Research Center chuan nikum ringawtah pawh khan lehkha nei lo Indian 7,25,000 vel zet US-ah an pem luh thu an sawi thung.
India hi Trump-a’n an rama thil thawn luh man a tihsan zingah a tel lo rih hlauh va. A hma kha chuan India hi ‘tariff king’ tia sawiin sumdawnna inremna ‘tibuaitu lian’ tiin a sawi a. Delhi hian US-in bungrua a lakluh man a tihniam lo a nih chuan na taka chhan let ve a nih tur thu a lo sawi tawh bawk.
India hian tun hnaia budget a pharhah bungraw thenkhatah chhiah lak a tihniam hret a, heng zingah hian motorcycle changkang, Harley Davidson pawh a tel.
India-a finance secretary chuan hei hian an ram chu ‘tariff king a nih lohzia’ a tilang tih thuthar lakhawmtute hnenah a sawi.
Kar hmasa khan Indian foreign ministry chuan ram pahnihte hi inkungkaihna nghet leh thuk zawk nei turin an indawr mek zel tih a lo sawi tawh.
Foreign Minister S Jaishankar hi India aiawha Trump-a lak luh inkhawmah khan telin US Secretary of State Marco Rubio nen Washington-ah an inkawm zui.
November-a Trump-a thlan tlin a nih hlim pawh khan Jaishankar-a hian an ram chu US president thawhpui turah engmah buaina an neih loh thu a sawi tawh bawk.