An thutiam tihlawhtlingin Karnataka Congress sorkar chuan Protection of Right to Freedom of Religion Act, 2022 – anti-conversion law tia hriat lar zawk leh BJP hun laia dan sawihlawh ber chu an thiatin an hnawl ta a. Hei bakah hian State cabinet chuan Kananada leh Social Studies school text book nikuma thlak danglama Hindutva ideologues chungchangte pawh an thlak danglam zui bawk.
Thla kaltaa Congress tena thuneihna an chan hnua Cabinet meeting tum hnih neihnaah he Act sawihlawh zet hi hnawl an remti ta a. Hei mai bakah hian BJP sorkar in kum 2020 a Agriculture Produce Marketing Act amendmnet a siam pawh a hnawl bawk a, hei hi farmer’s group tena an duh loh em em a ni bawk a.
Bill pahnih hnawlna tur hi July 3 a Budget session ah pharh a ni ang tiin State Law and Parliamentary Affairs Minister H.K. Patil chuan Cabinet meeting neih zawh hnuah a sawi.
Assembly election neih hmain Congress te chuan manifesto an neihah ‘dan tha lo leh mipui tana tha lo dan te’ hnawl vek an tum thu an tlangaupui sa tawh a. Leader of Opposition a nih lai pawhin Chief Minister Siddaramaiah chuan tum tam tak chu Congress-in thuneihna an chang a nih chuan anti-conversion law chu hnawl a ni dawn a lo ti tawh bawk a. he dan hian State chungah politics leh vantlangah pawh inhnialna nasa tak siamin Congress leh Christian community te chu duhlo langsar em em te an ni.
Cabinet chuan RSS founder K.B. Hedgewar leh Hindutva ideologue V.D. Savarkar te chanchin school textbook a ziahlan lession lai chu an paihbo bawk a, he lession hi right-wing activist Chakravarthi Suliblele ziah niin kumin academic year atanga zirlaibu a telh tan a ni. Chutihrualin, a hmaa zirlai bu atanga paih tawh lession Savithri Bai P{hule, B.R. Ambedkar leh Jawaharlal Nehru te chanchin ziahna chu zirlaibu a telh a ni zui thung.
Sorkar chuan he mi kaihhnawihah hian supplementary booklet tichhuakin chu chu State a zirlai 72,000 vel te hnenah a sem dawn a. Member panga awmna expert committee te chuan Kannada leh Social Studies textbawkk Class 6 atnga Class 10 zirlai thlak danglam liantham 45 lai an nei tiin Primary and Secondary Education Minister Madhu Bangarappa chuan a sawi.
Primary and Secondary Education Minister Kumar Bangarappa chuan, “BJP sorkar hma awmsa leh kalpui kha a ngaiah kan dah leh a ni mai a, an thlak danglam kha kan thlak danglam a ni mai” tiin a sawi.
-- Advertisement --
Fadnavis an Uddhav Thackeray hnenah zawhna nei
Maharashtra Deputy Chief Minister Devendra Fadnavis chuan an thawhpui thin Shiv Sena (UBT) leader Uddhav Thackeray chu Congress tena Savarkar leh Hedgewar Karnataka school syllabus atanga an paihah ngawihchuhah a puh.
BJP tena Thackeray chu a ideology leh grand old party te nena thawhhona an neiha zawhna an siam fo laiin Shiv Sena leader chuan a hma in Congress chief Rahul Gandhi, hnenah Savarkar chu an tan chuan Pathian tluk a nih thu leh an role model ber a ni tia sawiin amah sawiselna chu an teitheih dawn loh thu a sawi a. Savarkar sawi neona chuan opposition alliance a ti khi ang tiin Thackeray chuan a lo vau lawk tawh a ni.
Fadnavis chuan Uddhav Thackeray chu thuneihna chan duh vang liau liaua a ideology te pawh hnawl zawk duhaha puh a.
“Lehkhabu atangin hming chu paih mai theih a ni a, mahse, thinlung atangin a paih ve theih loh a. He ram zalenna atana thawktu te hming chu nawhreh theih a ni lo. Uddhav Thacekray hnenah hian Congress te nena thawkho mek hi a ngaihdan ka hre duh a ni. Minority community te tihlungawi hi thuneihnana chan duh dan i pawm nge, Veer Savarkar hmuhsit hi i pawm dawn, nge lalthutthleng i thutin i lawm mai dawn?” tiin zawhna a siam a.
“Uddhav Thackeray hnena ka zawhna chu an malchunga i thutna tena freedom fighter Savarkar hming an nawhreh emaw sakhua danga inlet i thlawp dawn tihna em ni? I ngaihdan ka hre duh a, thuneihna i chan theih nan engtiang chiaha inbeng hniam ngei nih?” iin Fadnavis chuan a sawi bawk.