Karnataka minister atana lak luh ni hnih tukah bâng nghal

Nilainia Karnataka-a minister atana lak luh a nih hnuah Zirtawpni khan Ramalinga Reddy chu cabinet atangin a bâng leh nghal a, hna chanpual an pekah an lawm lo.
DK Shivakumar-a kaihhruai sorkar thar tana mualphona lian tak a ni a. A bân thu nemnghetin Reddy chuan Bengaluru Development portfolio chu chief minister-in a tiam a; mahse, Irrigation pek a nih thu a sawi a, a pawm theih loh thu a sawi.
“DK Shivakumar hi chief minister hna a chelh hmain ka inah a lo kal a. Bengaluru portfolio min pek tur thu min hrilh a. Portfolio engmah ka dil lo va, amahin min tiam a ni,” a ti.
Chef minister-in portfolio hi vawi hnih a tiam a, irrigation ministry a chantir ta daih hi a, a pawm theih loh thu a sawi a. “Chuvangin, minister atangin ka bâng a ni,” a ti.
Chief Minister Shivakumar chuan Reddy-a chu an hruaitu hlun a nih thu leh an buaina hi a chin fel a ni dawn tih a sawi.
Reddy-a erawh chuan Shivakumar-a hnuaiah eng chanvo mah a pawm dawn loh thu a puang zui a. “Bengaluru portfolio min pe leh a nih pawhin ka pawm lo vang. MLA hna ka thawk ang a, Congress-ah ka awm ang,” a ti.
Ningani zan khan chief minister hian a minister 13-te chanvo a pe thar a. Reddy-a hi chhun lama portfolio chungchanga thutkhawm pawh a chhuahsan tau tawh nia hriat a ni.
BJP chuan Reddy-a bân chungchangah Congress chhungah inthenna a awm niin an sawi a. Union Minister Pralhad Joshi chuan NDTV hnenah, “Sorkar chhungah inhnialna a awm tam phah dawn a, chief minister thlak hian Congress a pui dawn lo,” a ti.
Bengaluru-ah party tan chuan Reddy-a hi mi langsar tak a ni a. Kum 73 mi hi BTM Layout bial atangin MLA vawi riat lo ni tawh a ni a. Karnataka sorkarah Minister of Transport, Muzrai leh Minister of Home Affairs hna a thawk tawh bawk.