Kartawp Durand Cup inkhel thlirna

Football tournament upa zet Durand Cup chu a tum 132-na atan tunlai hian khelh mek niin, Inrinni khan Mumbai City FC (MCFC) chuan Kishore Bharati Krirangan, Kolkata-ah 3-1-in mualneitu Mohammedan Sporting an hneh a; Zirtawpni khan Guwahati-a Indira Gandhi Athletic Stadium-ah North East derby khel bawkin, mualneitu NorthEast United FC (NEUFC) chuan sili faiin Shillong Lajong an sawp.
MCFC 3-1 Mohammedan
Islanders hian hnehnain season bul an tan a; minute 35 an khelh tlin rualin goal thum an thun hman!
Kolkata club Black and White brigade lam beilet tan David Lalhlansanga chuan an siphurh pakhat sutin mualneitu team beiseina siamsak ve bawk mah se Lalianzuala Chhangte, Rostyn Griffiths leh Jorge Peryra Diaz-te goal hmangin MCFC an chak ta tho a ni.
Mumbai City goal hmahruai hi Greg Stewart siamsak atanga minute 12-a Australian defender Griffiths tihluh niin, minute 10 an khel leh tihah Spaniard Alberto Ripoll pet chu Mohammedan keeper Lalbiakhlua Jongte chuan lo dansak mah se ball perlet la fuhin Argentine forward Jorge Peryra Diaz chuan MCFC goal hnihna a thawh ve leh.
Lalbiakhlua hian kum 2021-2023 chhunga Mohammedan goal-veng Zothanmawia Pachuau a thlak a, Zothana hi I-League club Gokulam Kerala lamah a insawn tawh a ni.
Ti chuan, minute 10 bawk an khel tling leh chiah tihah Biakhlua hian a chipui LZ Chhangte a hmachhawn leh a; Ripoll leh Bipin Singh-te thawhrah atangin Lunglei tlangval Lianzuala hian Mumbai goal thumna a thawh ve leh a, Kolkata mipui an reh duk!
Chutah Black and White brigade lam hian bengchhenna tur chhan goal lawm tur an nei ve ta a, tarlan tawh angin, mualneitu team goal neihchhun hi short corner hrinchhuah atanga Samad Mallick-a cross buaipuitu Mizo player dang David-a tauhluh a ni.
Minute 55-ah Rajasthan United atanga loan-a Mohammedan thuam inbel mek Lalremsanga Fanai chuan Alexis Gomez tan ball tha chhawpsak mah se Gomez hian goal pawnah a thawnchhuak a; a hnu lawkah Rem-sanga hi lakchhuah niin, Ganesh Besra chuan a thlak.
Inrinni inkhel dang Group F fixture lamah second half tir lama William Pauliankhum-a goal khat thun hmangin Rajasthan United FC chuan sikhat faiin Bodoland FC an hneh ve bawk.
NEUFC 4-0 Shillong Lajong
Zirtawpnia Guwahati khuaa North East derby-ah NorthEast United FC chuan duhthusama thain season bul an tan a, mikhual dimna thinlung an pu lo!
Indira Gandhi Athletic Stadium inkhelah hian Assam boy Parthib Gogoi chuan senior level-a a ‘hat-trick’ hmasaber hmangin home supporters hlimna a siamsak a, Highlanders hian Group D table-ah hma an hruai zui nghal.
He inkhel tan hma hian cultural programme leh opening ceremony buatsaih niin, Assam chief minister Himanta Biswa Sarma pawhin a telpui nghe nghe.
|an phat atangin mualneitu team-in awmze neia inthlungkhawm chung-in mikhual team an chhaih a; minute 26-ah Rochharzela chuan amah vengtu bumin box lamah a tlan thut a, khelmual nal taka ball a khalh hnuah Shillong keeper Neithovilie Chalieu venah chhuihin, keeper hian lo bengper mah se Gogoi tan hun tha a inherchhuah phah a, a goal khatna.
Chutah Romain Philippoteaux chuan Kenstar lakah penalty hlawh-chhuakin, Frenchman hian NEUFC goal hnihna a chhuihlut.
Hemi hnua an goal hnih dang chu Parthib Gogoi-a chanpual niin, High-landers hian FC Goa leh Downtown Heroes of Kashmir an tum leh ang.