Kartawp inkhel thlirna tawi

Kartawp inkhel thlirna tawi
Inrinni khan Europe tualchhung league lian khelh chhunzawm niin, Germany ram lamah Bundesliga hmahruaitu Bayern Munich chu Hamburg SV mualah an chak zo lo a; Spanish La Liga hmahruaitu Barcelona erawh Elche khelmualah an chak thung.
Harry Kane chuan season kal lai inelna hrang hranga a goal 36-na thun bawk mah se Bayern hian second half-ah an hmahruaina an hum tluan zo lo a, Volksparkstadion-ah mualneitu team Hamburg nen 2-2-a inhnehtawkin, game 20 khelha point 51 hum chungin Bavarians hian Bundesliga table-a an hmahruaina chu an sawhnghet leh det tho a, pahnihna luahtu Borussia Dortmund lakah point kuain an la fal a, nizan result tarlan hman lohah Dortmund hian Heidenheim an mikhual a, an chak chuan Bayern nena an inkar hi an pawtzim hlek thei ang.
England captain Kane khan season kal laiah Bundesliga game 20 khelin goal 22 a tilut tling tawh a, Germany ramah a la chefuh tluang zel.
Spain ram lamah hmahruaitu Barcelona chuan Elche mualah 3-1 hnehna changin, La Liga table-a an hmahruaina an sawhnghet ve bawk a; match 22 atanga point 55 khawl tling tawhin, an hnuai chiaha pahnihna luahtu Real Madrid lakah point liin an sang a, nizan result tarlan hman lohah Real hi an mikhual Rayo Vallecano laka an chak ve leh chuan Catalan-ho hi a ngai ang bawkin an zim hnai leh thei ang!
Inrinni inkhelah Lamine Yamal chuan goal hmahruai khungin, goal khat dang a siam chhuak a; Alvaro Rodriguez chuan Elche siphurh a sut hnuah team pahnih hi first half-ah an inhnehtawk phawt.
Second half-ah mikhual team tan Ferran Torres leh Marcus Rashford-te’n goal khat ve ve thunin, lehlam pawl goal lam hawia tum 30 zet ball thawnlut tling Barca-in an hun tha neih an bawhpelh hnem zozai lutuk a, goal thum bak lawm tur an nei zo lo!
Barcelona rawlthar kum 18 mi Yamal khan season kal lai inelna hrang hrangah belhkhawmin Nou Camp club tan goal 13 a thun tling ta.