Kawng a chhe telh telh

Sairang leh Khamrang inkar kawng a chhiat avangin nikum lam atangin mipuiin harsatna an tawk thin a, tun hnaiah pawh he harsatna hian nghawng a nei lian hle. A zia deuh a, a siam pawh an siam, mahse he kawng hi a chhe leh telh telh tawh.
Truck khalhtute’n Sairang leh Khamrang inkar kawng hi a chhe leh telh telh tawh tih an sawi a, lirthei pawh an intlar nasa leh tawh a, kawngah an thang rei telh telh tih an sawi.
July thlaah khan he kawng chhia hian mipui a nghawng nasa a, tluang taka siam a nih theih nan August ni 2 atanga ni 7 thlengin Sairang leh Khamrang inkarah hian lirthei an tlan lo. Ni 7 zanah lirthei hi an tlan tan a, harsatna pawh a zia. Mahse kawng hi a la tha tak tak lo a, September thla chawhnu lamah phei chuan lirthei pawh an thang rei leh tawh.
Mizoram Truck Drivers Association (MTDA) hruaitute chuan kawng hi a chhe telh telh a, a chhe leh viau tawh tih an sawi a, Khamrang atanga Sairang thleng turin bungraw phur lirtheite zan thum te an thang thin tih an sawi.
A chhuk lam pawhin hun an hmang rei a, a chho lam phei chu zan thum te an thang tih an sawi a, lirthei pawh thui deuh deuh an intlar leh tawh an ti. Amaherawhchu, tun hnai teah hi chuan truck tlu a awm lo an ti a, lawmawm an tih thu an sawi. Hriat theih chinah September ni 7 kha he kawnga truck tluk hnuhnun ber a ni.
Ke ruk nei, quintal 180 te, 190 te phur thinte pawhin tunlaiin quintal 160 bak an phur ngam lo tih an sawi a, August thla tira an siam, lung an vawm khawmte kha a darh leh deuh vek tawh tih an sawi bawk.