Kawng bal leh buhfai dinhmun en

Kawng bal leh buhfai dinhmun en
FCS&CA minister B Lalchhanzova chuan Aibawk Supply kudam leh Aibawk- Darlung kawng, Tlawng lei bula lei tlahniam chu Nilaini khan a hmunah a enfiah.
Aibawk PDC Supply kudam huamchhungah hian khaw 6 – Aibawk, Maubuang, Phulpui, Sateek, Tachhip leh Thiak an awm a. Ration card hi a vaiin 1563 awmin, chhawrtu 6734 an awm a ni. Kumin August hian Aibawk kudam-ah buhfai stock quintal 1432.90 a awm a, hei hian kumin October thleng sem tur a daih. Aibawk hi Monsoon Stock Centre a ni lo chungin, sawrkar hmalakna azarah stock a tam lai tak a ni tih sawi a ni.
Minister chuan lei tlahniam tuartu ram neitute, he kawngin a chawm khuate a tawrhpui tih a sawi. Mipui harsatna thleng thei sutkian thuai dan ngaihtuahin sawrkarin a tih theih ang ang tinghalin, PWD minister pawhin a ngaihven reng tih a sawi a; Kanghmun tlangdung mipui chu thlamuang taka awm turin a chah.
Aibawk- Darlung kawngah hian August 5 khan lei khi chat hmuh a ni a, August 6-ah PWD hotuten en nghalin kawng chhan theih dan an ruahman a, report leh estimate an thehlut nghal. Hetih laia estimate hi cheng nuai 31 a ni a, work schedule-a telh tura hma lak a nih mek laiin, August 14-a ruahsur avangin a mual chawpin a min a, kawngpui pawh metre 200 vel a minpui a ni.
August 15 khan PWD hotuten kawng thar siam dan tur an enho a, hemi ni hian survey an zofel. Kawng thar hian mual chimna chhakah lung bang thiah phei mai nise tih a ni a, tuna kawng awmsa a nghet tha laia pawh thla leh tura ruahman a ni. Kawng chhuat grade (chhuk/ chhoh dan) hi ‘1 in 20’ a chhuak tura alignment plan siam a ni a, a sei zawng metre 700 a ni a, a ko san zawng hi a sanglai berah metre 15 a ni. Kawng tharah hian lined side drain bakah hume pipe culvert hmun thumah dah nise, an ti. Kawng hi alkatra phah tum a ni a, hnathawhna tura sum ruahman hi nuai 170 a ni.