Kawng chhia leh a behbawm….
Tunhma pawhin kawngpui chhia-in nghawng hrang hrang neiin mipui harsatna hrang hrang a lo thlen tawh thin a, tun tum ang em ema Legislator rual inrawlh tamna ang hi chu a la awm lo a tih theih awm e.
Hetih lai hian eptu party lam lahin ruling lam an lo vawm ve char char bawk a. Tun hnaia Congress |halai thuchhuah chuan, “Kawng chhe thawm that mek ZPM minister leh MLA ten ni tin an invil chhawk a ngai ta mai hi PWD minister rintawk lohna move-na…” tih te, “Minister leh MLA ten kawng siam an vil a, PWD engineer-in-chief leh bawrhsap-ten kawng an tlawh ve thung… kalphung thar lehlinzia leh kalphung mumal an neih lohzia tichiangtu a ni…” tiin an lo tarlang rawl nen; tun tum kawng chhia zet chuan a nghawng kual thui hle mai.
Thil man a san phah loh nan sawrkarin hma la rawh se tiin Joint Civil Society of Mizoram (JCM) chuan awrawl an lo chhuah ve bawk a.
Kawng a chhiata bungrua a lo luh theih loh hian, thil man a to vat thin a; hei hi hnamdang tihchhuah nge ni a, keimahni a ram leilung fate zawk? tih hi survey neih hial tlak niin a lang.
Thil pakhat, mak angreng tak chu, petrol/diesel hi a ni. Kawng chhiat avanga tuialhthei phur lirthei an lo luh theih loh hnuah, filling station hrang hrang a ruak a, hun rei lote chhung chu ‘Coupon hmangin a lak theih’ tih a han ni phawt a, mahse filling station thenkhatah chuan Coupon pawh a hman theih loh zui leh thuai a.
Hetih chhung hian, Mizofed filling station bul lawk, chil chhak phak tak takah chuan, a black-in petrol an lo zuar char char thei ve thung a. Chubakah, khawpui chhung kawngpui kamah ualau takin black-a petrol zuar an rawn inlar sup sup bawk a, litre khat Rs 150 te, a aia to zawkte pawhin an hralh chur chur tho.
Filling station zawng zawng a ruak huai a, chutih laia khawlai lama black-a petrol zuar an inlar sup sup thei si hi, hetiang dan kalha practice mek tihtawp hi “Aikal lak” tihtawp aiin a harsa deuh tihna em ni dawn!
Tuna kawng chhia avanga hartsatna thleng mek hi sutkian hun chu a la awm ngei ang; hetiang hi a thlen nawn tawh loh nan fur ruahtui a hul veleh sawrkar hian theihpalingkawhin tan han la tak tak teh se.