Kawng chhia vanga harsatna zia tan
Mizoram kawngpui pawimawh, Silchar leh Aizawl inkar kawngpui a chhiat avangin tun hnaiah Mizoramin harsatna a tawk a, chawlhkar tharah he harsatna hi a zia ta deuh.
September ni 21 zanah kawng chhia vanga lirthei dintirte tlantir an ni a, tuialhthei leh ni tin mamawh thil thenkhat phurtute’n Aizawl an thlen tak avangin harsatna pawh a zia ta deuh.
Kawnpui leh Rengtekawna lirthei dintirte chu Inrinni tlai dar 5.30 atanga Chawlhni tlai dar 5.30 thleng khan Aizawl panin Khamrang lamah tlantir an ni a, lirthei engemaw zatin Aizawl an thleng a ni.
Chawlhni tlai dar 5.30 atangin Thawhtanni ni lam dar 8 thleng khan Aizawl atanga tlan turte tan kawng hawn a ni leh a, lirthei 51 an chhuak tih thu dawn a ni.
Kawnpui leh Aizawl inkar, Khamrang leh Sairang lam kawng siam a nih avangin September ni 18 zan atangin kawng hi khar a ni a, a hmain kawng chhia vang hian lirthei an lo tlan thei lo rei hman bawk nen, tun hnai chawlhkar hnih vel chu Aizawlah tuialhthei leh ni tin mamawh thil a harsa hman a, tun hnaiah lirthei dintirte tlantir an ni leh ta a ni.
Chawlhni leh Thawhtanni khan Aizawlah tuialhthei phurtu lirthei an thleng tha pangngai a, hemi kawnga harsatna pawh phuhru turah ngaih a ni.
Thu dawn danin, ni tin mamawh thil thenkhat, Aizawl phurh thlen a awm tawh a, la phurh thlen loh a awm bawk. Mahse tun ang a nih chuan la thleng lo pawh hi thleng thuai turah ngaih a ni. La thleng lovah hian bawnghnute (Amul Gold) te pawh a la tel.
Bungraw phurtu lirtheiah buhfai phur an la ding a, rel kawng a chhiat avangin buhfai phurh tur a awm rih loh vanga ding an ni. Lirthei dang chu an tlan leh tan tih thu dawn a ni.
Amaherawhchu, kawng hi siam that thlap a ni ta e tihna a ni lo a, tlan theih naw naw tura siam a ni. Thawhtanni pawh khan chhun lamah kawng hi an siam dawn avangin khar leh a ni a, chuvangin ni tin mamawh thil hrang hranga harsatna hi reh nghal duak tura beisei tur chu a ni lo tih thu dawn a ni. Online hmanga thil chahnate pawh an la thawk mumal lo a, bungrua a la thlen loh avangin an la chawl tlangpui nia hriat a ni.