Kawng dan tumtute nen inbia Mamit kawng siamna tur tifel: – PWD minister

Mamit district kawng chhia avanga Mamit kalpawhna kawng pathum dan tum chungchangah Nilaini zan khan sawrkar aiawh leh kawng dan tumtute an inbia a. PWD minister chuan Mamit district-a kawngpui siamna tur hi sawrkar laipuiin a tihfel sak niin a sawi.
All NGO Mamit leh Commercial Vehicle Association Mamit chuan an district kawngpui, a bikin Mamit tlawhpawhna chu a chhe vek a, sawrkar hnenah thawmtha tura an ngenna in awmzia a nei lo tih an sawi. Sawrkar an ngaichang rei tawk tawh nia hria in, October 16 atangin tiamchin awm loin Mamit atanga Aizawl panna kawng, Mamit leh Bairabi inkar leh Mamit leh Zawlnuam inkar kawngpui chu lirthei eng chi mah kal loa dan an tum tih an lo sawi tawh a ni.
Thawhlehni tlai khan Mamit bawrhsap chuan kawng dan tumtutue hi a kawm a. Sawrkar hmalakna leh dinhmun hrilhin, kawng dang lo turin a ngen. Hemi hnua an sawiho hnu ah kawng dan tum hi tih tlang nise an ti a ni.
Thudawn danin, kawng dan tan tum ni – October 16 hi Dampa bial by election neih turah Election Commission of India aiawhten a hmuna enfiah an tum ni a ni bawk nen, district administration chuan kawng dan tum nhi thulh a nih theihnan Nilaini zan khan kawng dan tumtute nen hian an inbe leh a, PWD hotute pawh engineer in chief hoin an tel tih sawi a ni a. Thutlukna erawh he chanchin buatsaih lai hi chuan hriat hman a ni lo.
Hetihlai hian PWD minister Vanlalhlana chuan a social media account lamah Ministry of Road Transport & Highways chuan National Highway 44A (Lengpui – New Eden) thawh hmabak thawh chhunzawmna atan October 8 khan administrative approval leh financial sanction cheng vaibelchhe 170.96 a tihfel sak tih a sawi.
“He kawng hi khawthlang lam, a bikin Mamit district mipui tana kawng pawimawh leh innghahna a ni a, sawrkar hmasa huna contractor terminate tawh, kan sawrkarin chak taka kan bawhzui niin, sanction order a chhuak ta hi a lawmawm takzet,” a ti.
Hemi hma hian NH 44A-in a hel tak (bypass road) siamna tur (one time improvement) sanction an hmu tawh a. Kawng thawmthatna (short term maintenance contract) sanction an hmu tawh bawk tih sawiin, “Hengte nen hian tender mek a ni a. Tun working season intan phatah kut kan thlak nghal dawn a, fura kan buai fona thin kan sukiang thei tur hi Mamit district mipui ka lawmpui hle,” a ti.