Kawng laihin tui tlan a tih buai thu EF&CC-ah thlen

Aizawl tlaklama bypass road laih mek vung paih duhdah vangin Aizawl khawpui tui tlan Tlawng leh a fintu luite ho a tih nut nasat avanga hma la turin Environment Forest & Climate Change department ngen an ni.
Centre for Environment & Social Justice (CESJ) thuchhuak chuan, kumin August 28 khan Aizawl tlaklama bypass road laih mek vungin Tlawng leh a fintu lui, Aizawl chawmtu a tihchhiat nasat avangin district magistrate hnenah kawng laih mek chu titawp lailawk tura ngenna lehkha an thehlut a. DC/DM thuneihna a lo nih chiah loh avangin, lui ecosystem tichhiate chunga action la thei leh hmalak mek titawp thei chu divisional forest officer (DFO) Environment Forest & Climate Change a nih angin, September 15 khan DFO Aizawl hnenah he kawng laih mek hi stay turin ngenna lehkha an thehlut tih a sawi.
Kawngpui sial a nih pawhin mihring nunna hnar, tuikhur leh a hnar luite (perennial river) leh luipui (major river) tichhe lo thei ang berin, environment dan leh hrai zawm tura mawhphurtute phut an nih theihnan mipui aiawhin an mawhphurhna hlen lote an umzui thin tih CESJ hian sawiin, ‘Tualchhung, district, leh state thuneitute hnenah complaint kan siam a, chu chu a sawt loh chuan National Green Tribunal, High Court leh Suprem Court thlengin kan kal thin,’ a ti.