Kawng siam chak lo, kar khat nghak dawn
Mizoram chak lakna kawngpui, National Highway No.6 Kolasib leh Kawnpui inkar chu lirthei dan hun siam meuha siam a ni chungin, contractor-te an che chak loa, ZPM chuan kar khat chhunga hmasawnna hmuh tur a awm lo a nih chuan na zawka hma lak an tum tih an sawi.
ZPM Kolasib leh Tuirial Block chuan Nilaini khan he kawng thawmthat mek hi an tlawh a. Nitin lirthei kal tur dangin contractor-ten hna an thawk chungin, hmasawnna a awm lo chu mipui zahlohna a ni tih an sawi. Kawng chhia chu a ngaihsaktu tur ber sawrkar a ngawi nia sawiin, Road & Infrastructure Development Board a din chuan chak zawka hna thawk turin contractor-te nawr se, awmze neiin he Board hian hna a thawh a ngai tih an sawi a ni.
Kolasib leh Kawnpui inkar kawng chhe lai chu belhkhawmin metre 400 bak a ni lo tih sawiin, mi 200 velin thawk se rei thawh ngai loa zo daih tawh tura an ngaih thu an sawi. Contractor-te chu kar khat hun an siamsak thu leh hemi chhunga an hnaah hmasawnna an hmuh loh chuan a tul angin hma an la dawn tih an sawi a. Mi nawr rum rum chu an duhdan ni lo mah se, sawrkar berin a vei si loh avangin an tih a ngai tih an sawi a ni.
Kawng siamtu Salome Construction chuan lung lamah harsatna an neih avangin labour an dah tam thei lo niin an sawi a. An lung lakna quarry kawng a that loh avangin tun ruahsur lai hian lung a phurhchhuah theih loh niin a sawi. Hetih lai hian Kawnpuia lung quarry neitu pakhat chuan lung an nei reng a, contractor-te hian bill an pek theih loh vangin lung hi an pe duh tawh lo tih a sawi.
ZPM-in an tlawh lai hian labour 10 chhawrin, excavator 2, road roller 1 leh Hyva 2 bakah tripper (912) 2 an dah a. NHIDCL hnenah chuan contractor hian mi 40/50 an chhawr dawn thu an hrilh.
NHIDCL hotute chuan kawng thawmthatna atan contract agreement an siam lo a, an hnathawh milin contractor-ten bill an siam anga, sum pawh pe thin tura inremsiam an ni tih an sawi.
ZPM hruaitute leh contractor-te inbiaknaah kawng chhiatna hmun hrang hrangah labour an dah belh anga, hei hi karkhat hnuah an en ho leh dawn a ni.