Kawng siam tibuaitute enfiah

Kawng siam tibuaitute enfiah
NHIDCL kawng laih mekin a paltlang Keifang kawngpui sira in leh lo nei engemawzat, laih remti lote chu Thawhlehni khan Saitual bawrhsap Dr Lalngura Tlau chuan a hmunah a enfiah a. Heng ho hi compensation lak tur zata lungawilo, compensation la tawh in la thiat lo, sawrkar ram (road reserved) a in sa leh kawngpuiin a sut loh tura ngaih, tel leh si te an ni.
Bawrhsap chuan mahni ram /in hmun lo ram (LSC) chin chiang taka enfiaha hrechiang thin turin mipui a chah a. Compensation chungchanga buaina tam ber chu an ram huamchin an hriatchian tawk loh vang a ni, tiin, kawngpui a that chuan ram a changkang a, hmasawnna chak taka a kal theih nan harsatna siam lo turin mipui a chah. Keifang paltlang khua, district, state leh international boundary a awm avangin mi tam takin an chhawr tangkai kawngpui a ni a, a that thuai a tul tih a sawi a ni.
Khawchhunga in sa tam takten sawrkar ram kawngpui (road reserved) nekin pillar phunna atanga kawngpui lam nek zelin, in hi sak a ni tlangpui tih sawi a ni a. A chhan ni bera lang chu, LSC rules and regulation-ah road reserved inziak hriatchian loh thin vang a ni tih sawi a ni. Highway chungchanga buaina tam zawk chu in leh lo rei tak lo din tawhten mahni ram emaw tia road reserved-a in sa an nih thin avangin sawrkar hotute leh mipui inkarah harsatna a awm ta thin tih sawi a ni bawk.
Bawrhsapin a enfiah hnu hian NHIDCL chuan hna chhunzawm nghalin khawchhung kawngpui pawh khawih zui a ni.