Kawng siam vangin khar dawn

Aizawl hmun hrang hrangah PWD-in kawngpui an thawmthat dawn avangin hemi chhung hian kawng hi khar a ni dawn a. Hnathawh tibuai theiin lirthei leh thildang dah phal a ni lo bawk.
Senior SP Traffic hriattirna tihchhuah danin, PWD hian March 11-13 chhung, chawhma dar 10.00 atanga tlai dar 5.00 inkarin Treasury Square atanga Venghlui chhuk thla Pi Pangi Peng inkar kawng siamthat hna a thawk dawn a, hnathawh tibuai thei turin hnathawhna huamchhung kawngpuiah lirthei leh bungrua dah phal a ni lo.
March 12 (Pathianni) hian Bazar Bungkawn atanga Sikulpuikawn inkar kawng chhe lai PWD hian a siamtha dawn a. Zodin Square Traffic Point atanga AR Mandir hnuai phei, Canteen kual chu siamthat turah hian a tel avangin helai kawng hi khar a ni dawn tih mipui a hriattir a. Hemi chhung hian chhimlam atanga hmarlam pan tur lirtheiten Zodin Square Traffic Point atangin Baza tlang hnuaiah an hel chho thei dawn a ni. Zodin Square Traffic Point atanga overbridge Baza tlang hnuai Mandir opposite-ah hnathawh hun chhung hian lirthei engmah dah phal a ni lo.
PWD hian vawiin, March 11 hian Dinthar Thlanmual atanga Kanan Road siamthat hna a thawh dawn bawk a. Helai kawng hi khar a ni dawn tih SP Traffic hian mipui a hriattir. Hnathawh tibuai thei turin hnathawhna huamchhung kawngpuiah lirthei leh bungrua dah phal a ni lo.
March 12 – Pathianni hian Electric Veng St. Mary’s Church atanga Bazarpui peng, New Market luh thlakna inkar kawng an siamthat dawn avangin helai kawng hi khar a ni dawn tih mipui hriattir an ni.
Heng hriattirna hian chhiatrupna thil – kangmei leh emergency kaihhnawiha duty, dan leh thupek pawimawh bika police leh magistrate duty-te chetvelna erawh a huam lo a ni.