Kawng siamin YMA hnatlang Lirthei tangte eitur pe

Silchar lam atanga Aizawl kalna kawngpui pawimawh a chhiat avangin tunlaiin Mizoramin harsatna a tawk a, kawng hi siam mek a ni. Khamrang Branch YMA te’n kawng siamtu PWD te an pui a, Inrinni khan an hnatlang.
Kawng chhia vanga harsatna karah chanchin ngaihnawm sawi tur a awm a, Khamrang YMA te’n kawng chhiaa tangte eitur an pek thuin state pawn hmun thenkhat a thleng.
Khamrang vel hi kawng chhiat zualna hmun a ni a, Khamrang leh a chhehvelah lirthei tang pawh a tam. Inrinni khan PWD te puiin Khamrang Branch YMA te an hnatlang a, mi 60 chuang an thawk chhuak.
“Khamrang tan chauh a ni lo, Mizoram tan kan hnatlang a ni. Kawng chhia vangin ramin harsatna a tawk a, YMA a awm alawm tiin kan lo hnatlang ve a ni,” YMA Khamrang Branch president Ramchangliana Chhangte chuan a ti.
Harsatna thlen tirh atang khan hnatlang tur hian an inkau reng a, thuneitu lam hnenah pawh sawiin an ngaichang reng tih a sawi bawk.
Inrinni khan Melthum atangin kawng siam nan PWD hian lung an la a, Khamrang a thlenin YMA te hian an lo pui a ni. YMA member-te bakah YMA Chhang te pawh an hnatlang.
Lung hi an thiar a, kawng chhiaah vawm lutin an rem bawk a, chhut ngai an chhu bawk.
In 180 vel awmna Khamrangah hian lirthei engemaw zat an tang a, Zirtawpni thleng khan Khamrang YMA te hian lirthei enkawltute hi eitur an pe.
An hruaitute sawi danin, lirthei khalhtute hi buhfai leh dailuah an pe a, lirthei khalhtute hian thuk an nei a, a theih ang anga inpeizawnin eirawng an inbawl chawp a ni.
“A tam zawk fe chu hnam dang an ni a, khatia eitur kan han pe kha, an lawm lutuk kha a mak zawk. Mizote thatzia an sawi chul mai a, an ram lamah pawh whatsapp group velah thlalak nen an post ve a ni awm e,” YMA president chuan a ti.
YMA te’n eitur an pek hian, hnam dangte hian lei tur emaw an lo ti a, pawisa an neih tawh loh thu an lo sawi a, a thlawnin an pe dawn tih an han hriat chuan an lawm lutuk kha an au chul mai a ni awm e.