Kawng siamtute an sawi angin an awm em tih vilpui turin ngen

Kawng siamtute an sawi angin
an awm em tih vilpui turin ngen
Ruahsur nasa leh leiminin a tihchhiat Serchhip district-a national highway siamthat dan tur chu Thawhtanni khan bawrhsap Paul L Khuma hoin an rel a, NHIDCL hnuaia contractor-ten kawng chhia an thawmthat dan tur ruahman an thehluh chu thuneitute nen an sawiho a ni.
Bawrhsap chuan khawtlang hruaitute leh mipui mimir hnenah ngenna siamin, NHIDCL contractor-ten kawng siamthat dan tur hun bithliah hi an zawm tha tawk em tih lo vilpui tur leh lo endik thin turin a chah.
Serchhip district-a national highway enkawltu NHIDCL hnuaia contractor-te hi hlawm (package) thumah then niin, hlawm tin hian kawngpui enkawl bik an nei theuh a. NH-02 laitu contractor chuan kawngpui an siam zawh tawh hnuah kum 5 chhung an vil zui dawn a, kumin atang hian an vil hun tur – defect liability period a intan.
Bawrhsap pisa atangin NH Team fehchhuakin, kawng chhe lai an fang a, thla an la vek a ni. Heng kawng chhia hi a ranglama siam leh thawmthat a ngaih avangin contractor-te hi sawipuiin, an thawh hun tur bithliah sak an ni.
Package-1 enkawltu contractor hian October kar thumna ralhmain an kawng enkawl blacktop hna thawh zawh hman an tum a. Kawng khuar lai hnawhkhah chu tunkar chhung hian zawh hman an tum.
Package-2 enkawltu chuan an kawng enkawl china khuar thuk leh chhe zual hnawhkhah hna chu tunkarah zawh an tum a. Ruah a la sur zel avangin kawng khuar lian vak lo awm belh siamthat hna chu chawl loa an thawh reng tur thu an sawi. Baktawng leh Serchhip inkar kawngpui November 15-ah zawh hman tum a ni a. Retaining wall chim chu October 15-a siam zawh hman an tum. November 15 atanga December 1 chhungin Sailiam atanga Keitum black topping zawhfel an tum a ni. An tum anga a hun taka an zo thei a nih chuan Serchhip by-pass a leimin nasat berna hmun khawih chhunzawm nghal an tum a, hei hi nakum January chhunga zawh hman an inbeisei bawk.